10 rezon ki plis fè jèn fi yo ansent avan lè

|GWOSÈS AVAN LÈ 

Plis moun fokis sou dosye majorite seksyèl an Ayiti lalwa fikse a 15 lane. Poutan, pa gen twòp deba serye ki fèt sou gwosès avan lè ki se youn nan gwo konsekans libète seksyèl parapò ak kriz ekonomik an Ayiti. 

Yon atik ki te pibliye sou sit LoopHaiti nan dat 20 me 2019, revele an Ayiti gen prè prè 21% jèn fi ki manman oswa ansent a disnevan. 

Si nou pa ka anpeche timoun yo gen relasyon seksyèl bonè, nou ka fòme yo pou yo konn konsekans yo e kòman pou yo fè fas ak sitiyasyon ki okazyone li. Tankou anpil lòt pwoblèm nan peyi a, dosye gwosès avan lè a (#grossesse #précoce) egzije aksyon pou akonpaye plizyè jèn ki viktim e anpeche plis nouvo ka.

Men 10 rezon ki ka lakoz yon jèn tonbe ansent twò bonè. Ou ka ajoute lòt nan kòmantè yo.

1. Pwoblèm ekonomik

2. Demisyon paran

3. Renmen ankachèt

4. Vyòl 

5. Edikasyon seksyèl timoun yo pa fèt 

6. Plasay modèn

7. Rapò seksyèl san pwoteje

8. Rezidans paran nan peyi letranje

9. Imatirite

10. Pedokriminalite

Pou rive redwi to fleo sa a, tout sektè dwe antre nan lit pou edike timoun yo sou fonksyonman kò yo. Gen twòp sijè tabou ki rann timoun yo pi vilnerab sitou ak aksè yo gen sou entènèt ak seri y ap gade k ap eksite yo. Se kòmsi edikasyon timoun yo depann de pwodiktè nan sinema ak entènot yo. Sa dwe bay gwo enkyetid paske nati a pa renmen vid. Depi paran pa fè devwa yo, nenpòt moun ap fè l: zanmi, atis, anakè, elatriye. 

Leta, legliz, lekòl, medya tout plimay ak ONG k ap travay nan pwoteksyon timoun dwe pran koze sa anchaj. 

N ap remake paran yo alèkile plis envesti nan etid klasik ak materyèl teknolojik pou fasilite aprantisaj timoun yo. Bravo. Se byen. An menm tan, yon bon ankèt ap montre malgre tout efò sa yo, jèn yo, sitou nan legliz, nan lekòl klasik e sou rezo sosyal yo pa twò sansibilize sou risk ki genyen nan fè sèks san pwoteje ak angajman pou abstinans seksyèl k ap pèdi valè chak tan k ap pase. 

Èske sa dwe kontinye konsa? 

Èske fenomèn sa a pa jwe gwo wòl nan analfebetis? 

Kisa sosyete a ap benefisye si gen bon jan mezi ki pran pou frennen sa? 

Repons yo se pou moun ki gen plis konpetans ak pouvwa pou pran sa an chaj. Pandan n ap tann, annou kontinye ankouraje jèn yo pwoteje yo e fè abstinans seksyèl.

JDE

Se Bondye ki fè tout vrè chanjman yo

 |EKSTRÈ /LIV GRATIS

Mwen ta renmen ou panse sou sa anpil. Tout moun, timoun, jèn ak granmoun, ki rive chanje tout bon se rezilta travay Bondye. Sa pa vle di yo pa fè anyen, jan chante a di a “ se gade m gade m wè m konsa”.

Bondye fè chanjman an, se vre, men premye travay la se ou ki fè l: ou repanti. Chanjman ki fèt nan ou se tankou w te yon machin ki anpàn. Si yo kite w kote w pran pàn nan, w ap ret kraze la men si yo mennen w nan garaj, w ap ranje.

Nan okenn ka, yon mekanisyen pa ka deside pran yon machin pou l ranje l san pèmisyon propriyetè li menmsi l te wè pwoblèm li genyen.

Bondye fè nou ak volonte pou n vin jwenn li oswa ale lwen li. Li ka chanje nou kèlkeswa eta nou, men fòk nou dakò tounen vin jwenn li. Se premye pa a ki konte, l ap fè rès la. Si se nou k ap di li va pran nou lè li vle, si li vle, se inyorans, eskiz ak chwa nou fè pou machin nou an rete kraze nan mitan wout la oswa nan pakin lan ki se sosyete a.

Klike sou lyen koulè vèt la pou w telechaje liv REFLEKSYON BIBLIK SOU LAVI KRETYEN AN  gratis!