Pawòl ou ak aksyon w: kisa ki plis konte?

M sonje lè m te gen 15 lane yo konsa, te gen yon patnè ki te pi gran pase m. Pandan m t ap mache, li t ap menase m. M ba l yon presyon atout m te pè. M di l depi l manyen m, m ap goumen ak li. Pou rezilta, li ban m yon zoklo nan mitan tèt mwen. M met men sou tèt mwen, epi m di : ou wè, ou wè? Li gade m epi l kontinye wout li. 

M te panse pawòl mwen te ka fè l pran presyon men se te byen konte mal kalkile. Aksyon misye te fè wè pawòl mwen yo pa itil anyen. Se te laperèz ki te kache dèyè yo. Li menm, malgre li pa t pale, li te montre li pa pè ak sa li ka fè. 

Èske se pa menm bagay la ki rive w lè w pale epi moun ki fè silans yo ap demanti w, dezapwouve w, antre nan patiraj ou pou defye w? 

Si gen konesans bay konn pale, ki enpòtans li anfas moun ki konn aji e k ap aji kontrèman ak enpak pawòl ou ta dwe genyen. 

M panse l enpòtan pou nou reflechi avan nou pale nonsèlman pou n konnen sa n ap di men pou n pa fè bak lè sitiyasyon an mande pou nou aji. Paske, sa pa itil anyen si w pa ka fè sa w ap di a. Plis pa itil, si w pa ka ede moun k ap aji yo nan aksyon yo. 

Pawòl nou yo enpòtan men lè nou fè sa nou di, li pi enpòtan. 

JDE

Leson pou ou menm ki gen pou w paran

Jeneralman, nou chak k ap viv se pwodwi relasyon seksyèl yon gason ak yon fi. Se Adan, Èv ak Jezi ki pa t fèt nan prensip sa a. 

Nòmalman, si w pòv pandan w ap li tèks sa a se petèt pwoblèm paran w ki te pòv oswa ki te gen lajan men ki pa t chwazi prepare pou ou. Sa fè, w ap viv yon lavi w pa dakò, ou pa t swete e w ap goumen non sèlman pou sa chanje men pou pitit ou pa viv menm jan ak ou. 

Leson m nan pa lwen. 

Antanke papa de (2) pitit gason, m pa gen pou m ap plenyen pou preparasyon paran m pa t fè pou mwen. M p ap di se volonte Bondye pou mwen paske Bondye pa voye pèsonn vin viv nan lamizè. 

Si m pa ka pitit gason m te swete ye paran yo m yo, m dwe travay pou pitit mwen yo vin pitit papa yo vle yo ye a. Si w pa ka pitit fi ou te swete ye pou paran w yo, devwa w se travay pou pitit ou yo vin pitit ou pa ka ye a. 

Pa kondane paran w paske yo pa t fè ase preparasyon pou ou. Li posib pou gran paran yo e gran gran paran yo pa t fè l tou. Ou pa ka defèt sa, men w ka anpeche sa fèt pou ou. 

Jodi a, ou nan plas pou w kritike papa w, sonje demen ou pral papa. Jodi a, w ap pale manman w mal pou sa li kite rive w, sonje demen ou pral manman. Kisa w ap fè pou pitit ou pa di w sa w ap di jodi a? Ki plan w genyen pou pitit ou pa fè sa w ap fè jodi a? 

Kisa w genyen ak sa w pa genyen? Ki kote w ye parapò ak kote w te dwe ye? Pa panike! Se moman pou w panse kisa w pral fè pou byenèt pitit ou a.

Si mesaj sa a te touche w, pataje l bay tout jèn ki gen pou vin paran. 

JDE