Gen yon moun ki te di: Depi yo kòmanse kritike w, sa vle di w egziste. Anpil moun konn di kritik pa ka anpeche yo avanse e gen lòt moun ki kwè kritik enpòtan pou dekouvri feblès yon pwodwi oswa yon zèv.
Yo fè diferans tou ant kritik pozitif e konstriktif ak kritik negatif e destriktif. Tout konsiderasyon sa yo ta montre kritik gen bon ak move kote l. Sa depan de kilès k ap kritike oswa jije a.
Mete sou sa, li difisil, pou n pa di enposib, pou yon moun pa kritike sa w panse, sa w fè menmsi l ta parèt san defo pou yon gwoup moun: relativite (filozofi).
Menmsi w pa ta renmen yo kritike w, li fasil pou w kritike sa w wè, sa w tande, sa yo vle fè w aksepte. E se menm sa k rive lè yon lòt moun ap kritike w tou. Kidonk, sa w dwe konnen, lè y ap kritike w, se asire sa w ap fè a bon, se sa w vle, se sa k dwe fèt. Tande kritik yo, pot koreksyon si posib, pa pran moun k ap kritike w pou enmi menm lè se sa l ta ye. Toutfwa, fò w pa kite sa moun panse fè efè negatif sou sa w kwè, ni sou enpak ou vle fè.
Antouka, se pa yon bagay ki fasil pou fè fas ak kritik, sitou lè w santi w fyè, konfòtab, eksperimante nan sa w ap fè. Ankò pi mal, lè travay ou fè a se rezilta anpil efò san asistans finansye ak teknik, alewè moral.
Lòt rezon ki konn fè w ka pa dakò kritik, se lè moun k ap pote jijman an pa konnen efò w fè. Li plis jije sou konsepsyon li, chwa li, vizyon pa l. Li pa ka fè diferans ant chwa w ak chwa pa l. E se la a tou pou w pa ta kite kritik destabilize w lè w konnen sa w ap fè a. Paske trè souvan kritik yo konn plis detwi pase yo konstwi. Gen moun ki p ap manke w menm si sa w fè a bon, jis pou l montre l konnen.
Nan ka w ta konprann tout sa n di la a parapò ak kritik ou konn resevwa, m ta renmen w panse kòman sa ka ye lè se ou k ap kritike. Paske, li konn pi dous pou jije pa moun pase l dous pou yo jije pa w. Asireman, se youn nan rezon ki fè Jezi te di pa jije pou yo pa jije w. Antouka...
Koulye a, pou n pa inyore vini kritik yo, men kèk baz (daprè mwen) ki ka kenbe yon kritik. Reflechi sou yo pou w pa twò negatif ni twò pozitif lè w a gen pou w jije yon moun, yon pwodwi oswa yon sèvis.
YON KRITIK KA CHITA SOU:
❌Jalouzi (1)
👉 Sa w kritike a bon men w tèlman jalou de moun ki reyalize l la, ou chache move kote a, piti kou l ye, pou w eseye detwi tout.
☑️❌Konesans (2)
👉 Kritik ou a soti nan sa w konnen. Men konesans sa a ka mal oswa byen dirije kritik ou a selon aryè panse w, nivo tolerans ou, edikasyon w, kilti w...
❌Pesimis (3)
👉 Natirèlman, ou toujou wè move kote tout bagay e tout moun. Kidonk, kritik negatif se pasyon w. Lè plizyè moun pataje jijman w lan menm, ou nan bòl ou nèt.
☑️Optimis (4)
👉 Natirèlman, ou renmen wè bon kote tout bagay e tout moun. Kifè, avan w kritike, ou apresye epi w korije, konseye ak tout sajès. Ou pa sousou tou, ou met koze a kote l dwe ye a: travay pwofesyonèl!
❌☑️Konpetisyon (5)
👉 Kritik ou a chita sou konparezon w ap oswa vle fè sou sa w fè ki menm jan ak sa yon lòt moun fè: trè popilè kote devlopman pa depann de leta. Pwiske gen konpetisyon lwayal e delwayal, youn ka detèmine entansyon w.
☑️❌ Lespri deba (6)
👉 Se defo oswa kalite w menm: pale sou tout sa w wè ak tande menmsi w pa konn anyen ladan. Sa fè, tout sijè nan bouch ou men si se nan lespri pou w agimante, konprann, fè wè kèk ti detay san bezwen detwi sa w ap kritike a, se byen. Kontrèman, se konplètman negatif.
☑️❌ Inyorans (7)
👉 Sa poko rive w konn fin kritike yon moun, yon sèvis, yon pwodwi, yon pati politik, yon ekip, yon peyi, yon ideyoloji, yon kwayans epi aprè se ou k ap defann li, damou li e menm prè pou w riske vi w pou li? 😊Sa montre a 90% ou te inyoran. Sa vle di w pa t gen ase agiman solid pou w kritike. Evite nimewo sa a paske l lakoz konfli, enmi jire, sitou nan epòk sa a kote tout moun ki gen aksè entènèt panse yo ka di yo sa yo vle san bon sans.
Men kisa kritike vle di menm? M kite w k devwa sa pou jodi a.
Pou plis tèks m ekri, vizite blog mwen an nan www.lestextesdejde.blogspot.com.
Mèsi pou tan w te mete pou w li l.
Toujou sonje lave men w ak savon pou fè prevansyon kont Corona viris.
😊 Ak anpil lanmou
JDE
11 mas 2020
