Kisa pou m fè si paran m pa dakò gason m renmen an?

Li rive souvan, jèn fi an konprann entèdiksyon paran li nan renmen vle di:

1. Li pa renmen l
2. Li pa konprann li
3. Li kont chwa l
4. L ap anmègde l
5. Li pa vle l prepare avni l

Gen lòt rezon ankò ou konnen pi byen pase m, men èske w janm pran yon ti tan pou w reflechi sou pwen sa yo chak fwa ou reyalize paran w anpeche w viv yon relasyon damou?

1. Li te renmen avan w
2. Li te pote w pandan 9 mwa

3. Li te fè tout sa k posib pou w te ka fè chwa pa w jodi a
4. Li renmen w
5. Li pa vle pou w echwe
6. Ou p ap pase tout tan w ak li
7. Li te nan menm sitiyasyon avè w lè l te nan laj ou

M konnen l posib pou youn nan 13 pwen sa yo m site la pa 100%, se nòmal men m pa t vle pran tan pou note sa jis pou fè w patisipe nan refleksyon an.

Mwen pa gen entansyon ba w yon konsèy ki pral gide w san volonte w ak konsepsyon w. Toutfwa, si kesyon vrèman preokipe w, mwen konseye w fè yon ti reflechi pèsonèlman oswa ak zanmi w oswa sou yon fowòm sou 7 pwen m site nan rezon ki ka fè w wè entèdiksyon paran w yo sou yon lòt fòm.

Pou sa ki konsène gason yo, byenke ka sa a mwens pwodwi, se menm konsiderasyon an, sofke paramèt yo ka apwofondi parapò ak plis libète yo genyen pou renmen. Malerezman, se libète sa yo genyen an ki fè fi yo plis viktim. Paske, si paran yo te met menm siveyans la sou ti gason yo, tifi yo t ap plis pwoteje. Domaj, paran yo kontribye nan matchis la nan minimize enpòtans edikasyon seksyèl tigason yo. Se pa san rezon gen tout ka sa yo kote se jèn fi k ap sibi vyol, agresyon, fè pitit san papa responsab e se plis tigason ki nan prizon.

M t ap kontan resevwa avi pa w, kesyon w, sijesyon w sou sijè sa a nan profesame@gmail.com.

Abone w ak blog la pou w ka jwenn notifikasyon sou nouvo atik k ap soti yo. 

Jérome Dorsonne Emerson

E si w te yon sous enspirasyon?

ACHIV: 6 MAS 2018

Gen yon panse ki di: Pafwa, move bagay ki rive n yo mete n sou chenmen pou n fè pi bon bagay. Sa depan de atitid ou genyen devan echèk yo, fason w reyaji fas ak obstak yo. Si se pa t sa, pèsonn pa t ap reyisi nan lavi.

Tout bagay ka enspire w nan lavi. Wi, tout bagay ka yon sous enspirasyon. Chak moun ou te kwaze nan relasyon zanmitay, santimantal oswa pwofesyonèl ka vin yon sous enspirasyon pou ou. Sa depan de sa w vle tire a: avantaj oswa dezavantaj, byen oswa mal...

De tout fason, nou chak se yon egzanp pou lòt, yon leson pou lòt, yon rezon ki fè yon lòt vle avansa oswa fè bak, yon mak, yon referans, yon sijè refleksyon pou yon tan oswa pou lavi.

Trè souvan, se moun ki fè nou byen nou rekonpanse alòske gen anpil moun ki fè n mal nou ta dwe medaye. Wi, anpil bèl bagay rive w, ou jwi anpil privilèj, Bondye louvri anpil pòt pou ou akoz yon moun ki te rejte w, yon zanmi ki te twonpe w, yon paran ki te bliye w, yon patwon ki te revoke w, yon menaj ki te kite w, yon pastè ki te sanksyone w, yon moun ki te minimize w. Moun sa yo merite remèsiman w san ipokrizi.

Pafwa, menm ou menm konn di poukisa se ou. Poukisa se ou ki nan plas ou ye a, se ou ki nan eta sa, se ou ki marye ak moun sa, se ou ki nan pwoblèm sa, se ou Bondye chwazi pou akonpli misyon sa.
Anpil evenman k ap pase, bòn nouvèl w ap jwenn te ka pwodwi aza si Bondye ki te kreye linivè a pa t gen kontwòl tan ak sikonstans yo, si l pa t illimite nan tan ak nan lespas. Men pwiske li la, pinga nou kwè sa k ap pase yo se aksidan.

Se pa paske w gen pwoblèm ak Jan pou w swete pwoblèm li pa janm rezoud. Se pa paske w rayi Jak pou w pa vle pèsonn renmen l. Se pa paske w pa ka sipòte Lik pou w vle tout moun rejte l. Dayè, ou pa dwe janm bliye Bondye la pou delivre, renmen, sipòte ak padone.

Toujou met nan tèt ou chak sa w pa fè gen yon moun k ap fè l, kòmanse ak Bondye. Ou pa gen dènye mo a, ni mwen ni pèsonn pa gen dènye mo a. Pandan w ap mande pou malè rive yon lòt, w ap mande pou Bondye pwoteje w, kòmsi se ou ki gen dwa jwenn pwoteksyon epi lòt la pa gen dwa. Ameriken an t ap di: Come on!

Li posib pou w kòmanse konprann apati jodi a ou se yon sous enspirasyon, mwen menm ak tout lòt moun ou gen pou rankontre. Nan chak bagay k ap rive w nan vi sa, chache konnen kisa w ka tire byen oswa mal ladan. Si w toujou vivan aprè nenpòt sa k rive a, konnen w pa pèdi paske sak pi enpòtan an ou genyen l. Se lavi.

Nou pa ka kontwole konbyen mò ki ta renmen resisite. Podyab, yo pa konn anyen. Nou pa konnen konbyen malad lopital ak kay bòkò ki ta renmen bay tout sa yo posede pou yo gen lavi sa ki nan ou a. Ou pa imajine kantite moun rich ki tap rejwi si yo ta di yo pa gen lanmò pou yo.

M pa anvi fin di koze jodi a men m ap fè w konnen li pi fasil pou yon moun ki dakò pèdi tout bagay pou l reyisi ke yon moun ki gen tout bagay men ki pa satisfè.

Kite lavi a enspire ou!
Kite lavi a aprann ou!
Kite lavi a korije ou!
Ou pa la pou lontan !

Jérome Dorsonne Emerson

Planifye oswa lapriyè avan, kisa pou m fè?

Maten an, pandan mwen t ap pale ak yon zanmi sou yon sijè prive, li te vle fè m konprann nan tout sa l t ap di m yo, volonte Bondye vin avan li aji. Lè l gen yon pwojè, li lapriyè Bondye epi l ap tann. Si se volonte Bondye, l ap fèt, sinon li p ap fèt. E tou swit, kesyon sa a te vin nan lespri m pandan m t ap vire kite l nan biwo l: Èske m dwe planifye avan m lapriyè oswa lapriyè avan?

Mwen p ap reponn kesyon sa a pou m fè moun ki kwè nan lapriyè dekwè epi adopte sa m pral di a. Mwen vle reponn pou m montre lyen ki genyen ant lapriyè ak planifikasyon nan volonte Bondye. Annou di tèt nou gen twa mo ki ka ede nou jwenn yon repons edifyan: LAPRIYÈ, PLANIFIKASYON AK VOLONTE. Kisa twa mo sa yo vle di?

Lapriyè se PALE AK BONDYE.
Planifikasyon se OGANIZE DAPRÈ YON PLAN
Volonte se SA YON MOUN (BONDYE) VLE OSWA DEZIRE

Annou sipoze nou prevwa yon aktivite pou evanjelize nan 8 jou k ap vini. Nou planifye daprè 6 kesyon fondamantal pou planifye yon evenman (https://lestextesdejde.blogspot.com/2020/02/planifikasyon-6-kesyon-pou-w-planfiye-e.html). Èske se yon erè si n pa t lapriyè avan nou te fè sa? Èske sa n ap fè a pa nan volonte Bondye deja? Si wi, èske n toujou bezwen lapriyè menm lè nou konnen sa n ap fè a bon?

Nou imajine dezyèm ka sa a kote n ap lapriyè pou n konnen si Bondye vle n reyalize yon tounen evanjelizasyon nan uit jou. Uit jou pase, nou pa jwenn pyès repons. Èske se pa paske Bondye vle ki fè l pa reponn? Èske l reponn epi n pa konprann? Èske n te oblije lapriyè pou n konnen si l dakò?

Dènye kesyon sa a ka ede n reponn kesyon prensipal la koulye a: Planifye oswa lapriyè, kisa pou m fè avan? Daprè mwen, lapriyè dwe fèt avan, pandan e aprè, sa depan de rezon m lapriyè a. 

Mwen lapriyè avan pou Bondye akonpanye m nan evanjelizasyon an paske se volonte l deja, menmsi gen danje ladan. Dayè, misyon Jezi te bay disip yo pa t janm san danje. Kidonk, si se pou evite danje m lapriyè, li pa bon. Okontrè, m lapriyè pou Bondye akonpanye m nan nenpòt sikonstans k ap rive nan evanjelizasyon ki ta aksidante oswa mouri.

Mwen lapriyè pandan evanjelizasyon an pou Sentespri touche kè moun m ap evanjelize a. Se pa mwen ni pawòl mwen k ap konvèti pechè a. Se pouvwa Sentespri a. Kidonk, pandan tout predikasyon an, mwen dwe lapriyè. 

Mwen lapriyè aprè pou m di Bondye mèsi ke gen konvèsyon ou pa. 
1) Mwen obeyi, 
2) Mwen preche, 
3) Mwen simen pawòl la (Bondye k ap fè l leve)
4) Mwen avèti moun sa ki pral pase aprè lanmò, 

Pou fini, nan yon kontèks ki pi elaji, mwen panse lapriyè avan oswa aprè planifikasyon pa pwoblèm pwiske Bondye gen kapasite pou l aji nan pawòl nou ak aksyon nou. Li posib pou sa n ap planifye a se travay Bondye. Answit, depi nou se pitit Bondye, li dirije panse nou. Ki fè, planifikasyon nou yo se rezilta prezans Sentespri li nan lavi nou. Ke nou lapriyè avan oswa planifye avan, nou pa dwe janm ezite aji lè nou santi sa nesesè, sitou lè Bib la, Pawòl Bondye a, deja pale sou nou prevwa fè a. 

Jérome Dorsonne Emerson