3 kalite endispansab yon lidè dwe kiltive

Kalite se tout sa ki ka fè moun ap ba w felisitasyon. Egzanp, pasyans ak renmen moun, se de (2) kalite. Epi tou se kalite ki fè nou ka diferansye bon ak move moun yo. Se diferan kalite yo k ap pèmèt nou chwazi bon moun ki pou dirije nou.

Yon lidè pa dwe menm viv e reyaji menm jan ak tout moun. Se yon moun k ap bay egzanp. Nou pral wè twa (3) kalite ki pa dwe neglije lakay yon dirijan konsa.

1. Yon lidè dwe onèt

Onètete se premye kalite pou n siveye kay yon lidè paske se onètete k ap di nou si l ap pran bon dezisyon yo. Yon moun ki onèt se yon moun, nan nenpòt sitiyasyon, menm si sa ap koute l lavi l, ki chwazi sa k ap benefik pou tout moun.  Li se yon lidè ki chwazi jistis sou inegalite e verite sou manti. Depi yon moun onèt ap pale, tout moun ap fè silans pou yo tande l. Alò, si yon lidè pa ka respekte pawòl l ap di, poukisa yon moun ta dwe respekte l?

2. Yon lidè dwe gen imilite

Gen yon sitasyon Gene Brown ki di: « Pwoblèm imilite a se paske w pa ka vante tèt ou pou w di w genyen l ». Imilite a se yon kalite tout moun ap wè nan ou. Se pa ou ki pral di w genyen l. Se youn nan pi bon kalite yon lidè dwe genyen. Sa ap pèmèt li sèvi lòt moun yo avan li sèvi tèt li.

3. Yon lidè dwe byenveyan

Yon moun ki byenveyan se yon moun ki vle byen ak bonè pou lòt moun yo. Se yon kalite endispansab pou yon lidè paske l ap vle pou moun k ap swiv li yo viv pi byen chak jou. L ap pran desizyon ki favorab ak kondisyon lavi yo.

Twa (3) kalite sa yo ap pèmèt yon lidè montre a klè kiyès li ye. L ap toujou vle fè enterè moun l ap dirije yo pase avan enterè pa l. Menmsi wout n ap pran yo konn souvan di pou nou, avèk yon lidè ki onèt, m ap kiltive imilite ak byenveyans, n ap sèten chimen an ap rive nan bout li.

Ou se lidè? Èske w kiltive twa (3) kalite sa yo?

Jefferson Ed Baptiste