Se plizyè ti kal ki fè anpil

Si chak moun fè ti sa yo ka fè, rezilta a ap fè enpak.

Si plis moun t ap fè sa l ka fè kote l ye a, pèsonn pa t ap bezwen deplase al lòt kote pou l fè sa ki posib pou ka gen chanjman. Nan zafè evanjelizasyon, m toujou di etidyan m yo sa: si kretyen nan chak zòn te chwazi evanjelize lakay yo, lòt kretyen pa t ap bezwen vin lakay pou fè travay pa yo. Malerezman, anpil fwa, se foul ak lanvi pou konnen kèk zòn ki motive misyon yo.

Nan ka Ayiti a, se prèske tout kote ki sanse gen pwoblèm enèji ki fè pa gen limyè lannwit. Se youn nan koz ensekirite. Tout moun konstate sa e anpil ladan yo gen enèji lakay yo. Si chak ri oswa chak katye te pran desizyon mete anpoul devan kay yo, anpil zòn nan t ap klere. Nou ka remake pito se pwofi sa kreye lè moun ki genyen l lan chwazi vann sèvis rechaj. Se pa yon mal, men poukisa yo pa vann limyè tou? Konsa, chak kay te ka klere chak aswè.

Fas ak grangou k ap tiye timoun e lakoz yo tonbe nan tout sa ki pa bon, si chak  moun te chwazi bay timoun ki pi prè l la manje, sa pa t ap rive. Malerezman, li pi fasil pou nou akize lòt responsab pase nou wè responsablite nou. Dayè, lè gen 2 ak 3 delenkan nan zòn nou, se lavi nou ki menase, se pa lavi gran otorite yo.

Gen yon asosyasyon an Frans ki rele "Colibri" Pierre Rubbi ak Cyrill Dion (2007) t ap dirije. Misyon li se chache relye e fè tout moun k ap fè sa yo kapab nan zòn yo epi fè enpak yo.

Gen plizyè milyon moun, asosyasyon k ap aji pou monn lan ka vin meyè. Èske w konnen non kèk moun, asosyasyon, fondasyon ak zanmi k ap travay koz sa yo? Petèt, ou se youn ladan yo deja?

Nou mete vwa nou ansanm pou n recòlte kont ensekirite men èske nou youn solidè anvè lòt? Kòman n ap ka gen sekirite si nou pa kiltive lespri solidarite paske vrè sekirite a soti nan viv ansanm. Se paske nou youn pè lòt ki fè zòn nou yo pa an sekirite. Si nou chak fè sa n dwe fè, nou p ap bezwen mete ansanm pou n mande sa nou tout ka fè.

Sa w ap fè a ka piti nan je w e nan je plizyè lòt moun men se ti kal sa w fè a ki mete ak yon lòt pou fè anpil.

Enspirasyon tèks sa soti nan liv "RÊVE TA VIE, VIS TES RÊVES" (Isabelle Servant)

®ATELIER 2020