Pa doute sou sa pawòl Bondye a di

KONSÈY POU EVITE TONBE NAN TANTASYON

9. Pa doute sou sa pawòl Bondye a di

Bib la di : « …Bondye pini moun li renmen. Se moun li rekonèt pou pitit li li bat » (Ebre 12.6).

Tantasyon yo ka epwouve w, yo ka fè w konnen si w se kretyen tout bon. Se sa ki fè, si w kontinye ap fè peche san w pa janm jwenn pinisyon, sa vle di ou pa pitit li tout bon.

Se pa yon bon siyal pou ou si w ap viv nan peche ou pa janm santi w koupab, ou toujou gen kè kontan malgre ou konnen w ap fè sa ki pa bon. Pou yon ti tan, ou ka santi w byen paske pèsonn pa konnen lavi an kachèt w ap mennen men Bondye konnen.

Chak fwa ou jwenn posiblite pou w rekonèt peche w yo, se yon okazyon pou w repanti oswa konvèti. Nan je pa w, ou ka wè gen plizyè lòt moun k ap viv nan peche ki pa janm soufri.

Pafwa, ou konnen kòman yon kretyen ap viv mal, ou konn anpil nan sa l ap fè an kachèt e ou di tèt ou si moun ki nan levanjil la lontan, moun ki gen plis konesans pase w la ap fè yon peche, ou ka fè l tou. Konsa, ou plis kwè gen moun ki ka fè sa Bondye pa konnen pase pou w kwè Bondye ka pini moun k ap fè sa l pa vle.

Poutan, se pa sou lavi yon moun ou dwe gade pou w gen krentif pou Bondye, byenke yon moun ka ede w gen krentif pou li. Gade pito sou fidelite yon moun nan levanjil ki chita sou sa Bib la di e non sou peche l ap fè ki kont pawòl ki nan Bib la.

Èv tap panse ak avantaj fwi a. Li pat panse ak sa Bondye te di a : « …jou ou manje l w ap mouri » (Jenèz 2.17). Adan ak Èv te meprize entèdiksyon Bondye, se sa ki fè yo te chase yo nan jaden an.

JDE

Sa tantatè a di a ka yon verite

KONSÈY POU EVITE TONBE NAN TANTASYON

10. Sa tantatè a di a ka yon verite

Devan tantasyon yo, menm jan ak Èv, ou ka anvi kwè, wè sa k ap lemante w la. Ou ka bezwen konnen si se manti oswa verite. Se sa ki te pouse Èv al manje fwi a. Bib la di : « Li santi li ta manje ladan l pou je l ka louvri. Li keyi kèk fwi ».

Menm jan an, pou w ka wè si fè sèks bon, ou aksepte fònike. An reyalite, li bon vre. Sinon, Bondye pa tap mete l. Zanmi w ki fè l deja ap di w li bon, w ap santi w gason/fanm aprè w fin fè l, men yo gen dwa pa janm di w sa ki ka rive aprè bon an. Se sa Èv pat panse a byenke li te konnen deja paske Bondye te di l l ap mouri jou li manje l. Ebyen, li te plis bezwen wè si sa sèpan an di a se verite pase pou l te pè lanmò.

Jezi te ka chanje wòch la an pen, Bondye te ka sove l si l te lage kò l anba e li te ka aksepte pouvwa dirije lemond, men se tap yon peche paske l tap aji sou lòd Satan.

Gen yon pwovèb kreyòl ki di « Chemen lajan pa gen pikan ». Sa fè, nenpòt kondisyon yo bay pou gen lajan, gen moun ki dakò. Malerezman, anpil pikan pral pike yo paske pou tout chwa w fè, gen konsekans.

Pa chache wè sa yo di a, se ka yon verite. Pa chache konnen sa ki kache a. Verite pa vle di bon bagay e Bondye pa entèdi nou bay manti sèlman, gen verite li vle nou evite tou. Li pat di Èv li pa tap wè si l te manje fwi a. Wè a se yon verite, men koute sèpan an pou fè l, se tonbe nan tantasyon.

Bib la di : « Gen bagay nou pa konnen, se bagay Bondye kenbe nan kè l pou li menm»
(Detewonòm 29.29). Si Èv ak Adan te fè Bondye konfyans, yo pa tap janm deyò nan jaden an.

JDE

Pa konfonn mirak/volonte Bondye ak tantasyon

KONSÈY POU EVITE TONBE NAN TANTASYON

12. Pa konfonn mirak/volonte Bondye ak tantasyon

Gen opòtinite ki parèt devan w, li pa gen lòt sans : se Bondye ki vle, se mirak Bondye. Depi w fin met nan tèt ou se sa, pa gen okenn vèsè ni konsèy k ap anpeche w pwofite l. Konsa, gen anpil kretyen ki kite chemen lafwa akoz yon djòb, yon relasyon, yon plezi.

Bib la pap bay manti:"...moun ki vle vin rich, yo tonbe nan tantasyon. Yo kite yon bann move lanvi san sans pran yo nan pèlen. Se lanvi sa yo k ap fè moun pèdi tout sa yo genyen,  k ap fin nèt ak yo. Paske renmen lajan fè moun fè tout kalite bagay ki mal. Gen moun ki sitèlman anvi gen lajan, yo pèdi chemen lafwa a nèt: se pa ti soufrans ki tonbe sou yo. (1 Timote 6.9-10)

Pa janm bliye plan Bondye yo sou kontwòl Bondye. Li pap tante w, sa vle di li pap mete okenn sitiyasyon devan w pou fè w dezobeyi pawòl li. Alò, tout sikonstans ki kilpabilize w, ki ka fè w aji kont volonte Bondye se tantasyon.

Ann pran egzanp yon gason ki pran randevou ak fiyanse li. Li di tèt li si l vini, pa gen moun nan kay la, sa vle di Bondye dakò pou l fònike. Sa se pa volonte Bondye, se tantasyon ki vini nan premeditasyon li.

Ou ka di tèt ou si tèl bagay rive, yon moun di tèl koze, w ap fè oswa di tèl bagay. Depi sa w ap di oswa fè a kont pawòl Bondye a, konnen ou nan tantasyon paske Bondye pa ka kontredi tèt li.

Ka toujou gen mirak, dayè Bondye granmoun men pa entèprete tonbe nan tantasyon pou mirak. Ou ka fè siksè, ou gen gwo renome epi w pase akote plan Bondye a.

Li fasil pou w konnen lè w tonbe nan tantasyon: sa ki tante w la fè w pèdi prezans Bondye. Ou pa gen tan pou levanjil ni legliz ankò. Tout sa ki nan lespri w se pouswiv chemen lanbisyon w.

Reziste!

JDE

13. Sispann panse ou se yon moun ki echwe

KONSÈY POU EVITE TONBE NAN TANTASYON 

13. Sispann panse ou se yon moun ki echwe

Santiman echèk se yon gwo danje devan tantasyon. Pwiske w konnen w pap ka reyisi, ou pa anyen, yo pa vle wè w, tout sa w eseye pa mache, ou di tèt ou, ou pa vo anyen. E se la w 

kòmanse reziye w. Tout sa k vin devan w pou w repouse, ou anbrase l paske pa gen okenn rezon pou w konbat, reziste. Dayè, ou deja echwe. Si w twouve w nan sitiyasyon konsa deja konnen se taktik dyab la pou w tonbe nan tantasyon. Santiman konsa pa soti nan Bondye. Okontrè, se nan moman ou santi w echwe yo pou w goumen plis paske trè souvan se nan dènye konba a ou ye. 

Echèk yo vle di w eseye, plis ou echwe se plis ou te eseye. Koulye a, ou dwe gade tout faktè ki te lakoz ou echwe yo epi repran kouraj pou tantasyon yo pa febli w. Nou ka pran egzanp yon jèn manman. Aprè l fin fè yon pitit, li gen dwa pa wè l enpòtan pou l evite fònikasyon ankò. Yon jèn papa, menmsi l ta legliz, gen dwa pa pè fònike ankò. Se pa yon bon atitid devan Bondye. Si w te fè yon erè, ou pa ka bay tèt ou rezon kontinye fè l. Si w pèdi yon fwa, ou pa ka panse w ap toujou pèdi. 

Listwa nan peyi Lafrans pandan lagè (1940) kite yon fraz selèb pou tout konbatan : «Lafrans pèdi yon batay ! Men Lafrans pa pèdi lagè » (Charles de Gaulle, 1890-1970). Fèlevanjil se mennen yon batay depi jou w te konvèti jouk ou mouri. 

Raple w pawòl apot Pòl yo akpitit li Timote nan lafwa: “ Mwen fin mennen batay la byen mennen, mwen rive nan bout kousmwen, mwen kenbe konfyans mwen fèm nan Bondye ». Kidonk, se pa nan bay vag w ap jwenn rekonpans Bondye sere pou konbatan yo men se nan kontinye batay devan tout sikonstans sanpèdi lespwa paske n ap sèvi yon Bondye fidèl. 

Reziste !

JDE

KONSÈY POU W EVITE TONBE NAN TANTASYON

TANTASYON (2)

Plis pase 20 konsèy de frè Jérôme Dorsonne Emerson.

1. Toujou sonje ou ka tante

Moun ki pi fò a se pa sila k ap mete l anfas danje a men se sila ki evite tout chemen, tout estrateji
ki ka mete l anfas li. Menm si w ta konn goumen, ou pa janm pèdi nan batay, se pa rezon pou w pote tèt ou bay lenmi an paske yon jou li ka konn estrateji w yo epi l pote laviktwa sou ou.

Nan menm sans sa a, menmsi ou ta konnen ou pap janm tonbe nan yon peche, oswa ou ta konnen gen kèk ka w pap janm ladan, ou pa dwe fè kòmsi ou ka afwonte l.

Apot Pyè pa di pou n afwonte Dyab la men li mande pou n « pran pozisyon » (reziste) kont Satan (Jak 4.7). Reziste se sispann goumen kont yon plezi oswa yon anvi. Kifè, chak fwa ou nan pozisyon pou w refize, se pou w kontinye refize paske se sa ki fè Bondye plezi. Sa ka rive li difisil pou w kontinye men gen
plizyè mwayen w ka itilize pou w kouri. Premye a se toujou mete nan tèt ou ou ka tante. Sa ap ede w sonje sa w dwe fè pou w reziste oswa sove.

2. Mond la chaje tantasyon

Bib la di : « Bagay ki soti nan lemond se egzijans lachè, se gwo tantasyon, se lògèy kap vire tèt moun lè yo gen anpil byen sou latè. Tout sa pa soti nan Papa a, se nan lemond yo soti. » (1 Jan
2.15). Tout kretyen ki konn li Bib la e ki gen Sentespri nan lavi li pa bezwen linèt pou wè pawòl ki nan vèsè sa a se reyalite, paske plis mond lan ap evolye, se plis moun pa vle bay tan yo pou sèvi Bondye akoz presyon, sousi e lògèy ki fè majorite moun bezwen posede bagay materyèl.

Levanjil la, pou anpil moun, tounen yon fab, yon listwa yo rakonte pou fè lòm dòmi paske sa li
mande pou fè yo ale kont sa anpil moun aspire. Si nou fè yon ti medite sou enfliyans rezo sosyal yo, mizik yo, fim yo, imaj k ap sikile e atitid anpil jèn, n ap reyalize lemond pa ka ede nou fè Bondye plezi. Se sa ki fè, si w vle reziste anba tantasyon, ou bezwen fikse je w sou Kris e sou tout sa ki ka fè w vin pi prè li chak jou. Nou dwe toujou repase pawòl Jak la ki di : «Pwoche bò kote Bondye, Bondye va pwoche bò kote nou tou. Nou menm k ap fè peche, lave men nou. Netwaye kè nou, nou menm k ap woule de bò » (Jak 4.8).

3. Tantasyon pa yon peche

Lè nou li nan Matye 4.1-10, nou konstate Jezi te anba tantasyon. Nan twa okazyon, Jezi repouse Satan nan sondaj li san li pat janm peche. Kidonk, tante pa vle di w peche men si w pa gen agiman ak taktik ou ka peche. Si w wè yon bagay ou pat dwe wè, ou tande sa w pat dwe tande, ou anfas yon sitiyasyon ki mete w mal alèz, pa kilpabilize tèt ou.

Ou pa peche toutotan w reziste kont santiman ou, òf ki mande w fè sa ki kont volonte Bondye. Pafwa, ou ka anvi joure yon moun ki fè w mal, ou ka vle fè oswa swete yon mal pou w vanje, men si w pa fè l, konnen ou pa
peche. Chak fwa yon move lide parèt nan kè w, yon moun ba w yon move konsèy, pa kouri aji. Reflechi. Kèk fwa menm, li bon pou w ta pase yon ti tan nan lapriyè. Konsa tou, ou ka mande kèk moun konsèy. Mwen sèten, nan gras Bondye ki gen tout pouvwa a, w ap genyen batay la.

4. Tantasyon yo bay anbisyon nou yo defi

Satan teste Jezi nan twa domèn k ap domine mond lan depi lontan : pouvwa fè mirak (v3) ;
lafwa nan pwomès Bondye yo (v6) e pouvwa pou dirije (v9). Fas ak tout, Jezi te reziste, li pat peche. Jezi te ka fè wòch yo tounen pen, li te ka lage kò l anba e li te ka aksepte dirije lemond,
men annou wè poukisa li te refize :
1) moun pa ka viv ak manje sèlman (v4) ;
2) ou pa dwe sonde
Bondye ;
3) se Bondye sèl ki merite adorasyon.

Byenke Jezi pat gen anbisyon, li pat kite Satan itilize tantasyon l yo pou l fè l obeyi l. Li pat okenn lòd pou l resevwa nan men Satan paske Bondye ka fè tout bagay e gen yon tan ki fikse pou sa. Konsa, trè souvan, ou tante nan sa w bezwen. Ou kouri aksepte san reflechi paske, pou ou, se plan Bondye yo kap akonpli. Poutan, se nan tantasyon ou tonbe. Se vre Bondye fè pwojè lapè pou nou men li pa mande nou prese ni dezobeyi l ; li bannou pouvwa pou n fè mirak men se pa pou n fè wè ni fè lajan ; li bannou
entèlijans pou dirije men li pa mande pou nou aksepte dirije nan nenpòt kondisyon.

Chak fwa ou
santi yon okazyon prezante pou w fè yon bagay ou te swete, poze tèt ou kesyon sa : Eske se pa yon tantasyon ?

Aswiv...

Jérôme Dorsonne Emerson
Li lòt atik:

1. sou blog http://lestextesdejde.blogspot.com/?m=1

2. sou Facebook:https://www.facebook.com/simervil.emerson

3. Entegre gwoup WhatsApp pou w resevwa mesaj chak jou:https://chat.whatsapp.com/8p1Pa7TAl9E6u

KISA TANTASYON YE ?

Tantasyon se tout sa ki mete lakay yon moun yon enterè, yon dezi oswa yon anvi pou l di oswa fè yon bagay.

Nan sa ki gen pou wè ak relijyon, sitou nan Krisyanis la, tantasyon se yon fòs ki pouse moun fè peche. Se yon mouvman ki soti anndan yon moun e ki pouse l fè sa ki mal.

Sa ki tante nou an atire nou nan yon plezi, yon bagay ki bon men ki pa dire pou anpil tan. Se premye bagay ki ta pou fè yon kretyen reziste anba tantasyon paske sa ki tante l la pap rete pou lontan.

Pou n ale pi lwen, tantasyon sou yon dezi ki pouse nou fè yon bagay yo defann oswa dekonseye.

BIB LA PALE SOU TANTASYON

"Lè eprèv tonbe sou yon moun, lè l anba tantasyon, moun sa a pa dwe di se Bondye k ap tante li. Paske, menm jan Bondye pa janm anba tantasyon pou fè sa ki mal, konsa tou Bondye pa ka tante pèsonn pou fè l fè sa ki mal. Men lè yon moun anba tantasyon, se pwòp move dezi moun lan k ap rale l, k ap pouse li. Konsa, move dezi a travay nan kè li, li fè l fè peche. Lè peche a fin fèt, li bay lanmò".

Jak 1.13-15

Pa kite nou nan pozisyon pou n tonbe nan tantasyon, men delivre nou anba Satan.

Matye 6.13

Pa kite dòmi pran nou, tande. Lapriyè pou nou pa tonbe anba tantasyon. Lespri nou byen dispoze, men kò nou fèb.

Matye 26.41

Tout tantasyon nou jwenn sou chemen nou, se menm kalite tantasyon tout moun jwenn sou chemen yo tou. Men, Bondye li menm toujou kenbe pawòl li : li p ap kite yo tante nou yon jan ki depase sa nou ka sipòte. Men, lè nou va anba tantasyon an, l a bannou fòs pou nou ka sipòte l, pou ka sòti anba li.

1 Korent 10.13

Men, moun ki vle vin rich, yo tonbe nan tantasyon. Yo kite yon bann move lanvi san sans pran yo nan pèlen. Se lanvi sa yo k ap fè moun pèdi tout sa yo genyen, k ap fini nèt ak yo. Paske renmen lajan fè moun fè tout kalite bagay ki mal. Gen moun ki sitèlman anvi gen lajan, yo pèdi chemen lafwa a nèt: se pa de ti soufrans ki tonbe sou yo.

1 Timote 6.9-11

POUKISA NOU TANTE ?

Nou tante paske nou gen move entansyon ki nan nou. Se entansyon sa yo ki fè nou tonbe nan peche. Tantasyon yo la pou fè nou wè sa ki pa bon nan nou. Men nou pa peche lè nou tante. Se lè nou kite tantasyon an fè nou dezobeyi lòd Bondye yo nou peche.

Egzanp, si yon moun di l ap ba w lajan pou w fè yon vye aksyon, li tante w. Si w pran lajan an e ou fè sa l di w fè a, se lè sa a ou peche. Kontrèman, si ou pa pran lajan an e ou pa fè sa l di w fè a, ou pa peche.

Tout sa ki parèt devan w pou fè w dezobeyi pawòl Bondye yo se tantasyon. Si w fè oswa di sa w santi a, ou peche.

KÒMAN TANTASYON VIN SOU WOUT NOU?

Pèsonn pa ka di li pa janm tante paske tout moun gen move lide nan tèt yo. Sa tout kretyen dwe evite se pa kite yo tonbe nan tantasyon. Men sa Bib la revele sou sa :

1. Pwòp dezi ou rale w, pouse w

 Jezi te di : « Se nan kè l tout move lide soti, lide touye moun, lide fè adiltè ak tout lòt bagay ki pa dakò ak volonte Bondye tankou lide vòlè, lide fè manti sou moun, lide bay manti » (Matye 15.19). Se nan entansyon ou genyen peche a soti. Sa vle di, si w ap fè move panse, w ap di move pawòl e fè move aksyon. Plis ou koute move pawòl, se plis w ap gen move lanvi. Plis ou gen move lanvi, se plis w ap fè vye aksyon. Se poutèt sa kretyen an dwe evite mizike imaj imoral e gade videyo oswa fim k ap kreye dezi pou l aji kont pawòl Bondye a. Se pa egare ou ye si w pa gade, imajine e tande tout sa ki ka fè w tonbe nan tantasyon, se paske w pa vle dezobeyi Bondye.

2. Move dezi a travay nan kè w

Se pat yon sèl kou Jida te chwazi trayi Jezi, li te gen move panse sa lontan avan sa. David te gen lanvi kouche Batcheba e Amnon te anvi fè lanmou ak Tama avan menm li te nan chanm nan avèk li. Dezi pou l fè sa a travay nan li jis li fè l tande move konsèy pou tonbe nan tantasyon. Kontrèman, Jozèf pat gen vye lide nan tèt li, se sa k fè l te reziste ak madan Potifa.

3. Move dezi a fè w peche

Se pa rad gason an wè sou fi a ki fè l fè peche paske tout moun pa tante nan rad. Se pa lajan an ki te fè Jida vann Jezi paske gen moun ki te ka refize l. Se dezi pou fè peche a ki lakoz peche, dezi pou vann Jezi a ki lakoz Jida aksepte lajan an. Se poutèt sa, Bib la mande pou nou pa mete vye lide nan tèt nou paske vye lide yo ka fè n fè sa n pa tap janm swete.

Gen moun ki fè krim jis pou yon jouman, gen lòt ki tiye tèt li akoz yon dèt. Depi w ap riminen move panse nan lespri w kont
yon moun ou rayi, li ka fè w fè aksyon negatif.

Kidonk, se pa pou fè n pase pou pi mal ki fè
Bondye di n pa rayi, se pou evite nou fè zak imoral. Trè souvan, aprè n fin fè yon peche, nou
regrèt. Poutan, avan nou te fè peche a, li te posib pou evite regrè a. Bondye vle pwoteje nou kont
aksyon malonèt, se sa k fè li bannou Bib la pou n konnen sa l vle e sa li pa vle (Som 119.11).

4. Peche a bay lanmò

Bib la di: “ Peche peye nou kach : li ban nou lanmò. Men kado Bondye ban nou gratis la, se lavi
ansanm ak Jezikri, Senyè nou an, yon lavi ki pap janm fini » (Women 6.23). Gen de fason nou ka
abòde lanmò tankou konsekans peche. Tout moun ka mouri paske yo tout se pechè akoz peche gran paran nou yo.

Answit, nan nenpòt peche yon moun pèsevere, l ap mennen nan lanmò. Se sa ki te rive Amnon: li te pèsevere nan lide pou l kouche ak sè li a. Li fè sa vre, li peche men finalman li te jwenn lanmò pou sa (2 Samyèl 13.1, 14, 33).

Aswiv...

Jérôme Dorsonne Emerson

PA KOUTE VWA KAP POUSE W DEZOBEYI

Gen twa aksyon mwen ta renmen ou analize nan tantasyon Èv la nan kontèks sijè sa a :

1. Bondye pase yon lòd,
2. Sèpan an di Bondye pap pini Èv vre,
3. Sèpan an pat ka defann Èv.

1. Bondye pase yon lòd

Nou esplike deja kisa yon lòd ye: se yon kòmandman yon moun ki gen otorite pase : Bondye, chèf, paran oubyen tout moun ki plase pi wo yon lòt.

Nou pa nan plas Èv men nou ka imajine Bondye te fin kreye bèt avan, e li te bay lòm pouvwa pou bay bèt non epi se bèt ankò ki pral fè lòm dezobeyi Bondye. Se kòmsi sèpan an te gen plis pouvwa ak plis otorite pase Bondye nan je fanm nan. Se sa ki rive lè yon kretyen konnen sa Bondye pa vle epi l kite lòt moun ap pouse l fè l.

Nan Bib la, li ekri : « Kouri pou dezòd lachè » (1 Korent 6.18). Poutan, gen swadizan kretyen kap vin anbrase lachè. Lè yon pastè osinon yon predikatè di sa pa bon pou fè oubyen gade, kategori kretyen Èv devan sèpan an jwenn pou di : se pa anyen, ou ka fè sa, sa a pa peche, pa okipe entèl, pale l ap pale,…

Tout pawòl sa yo se eskiz pou dezobeyi. Lòd Bondye pase dwe prime sou sa tout moun ap di, kit se te paran, zanmi ak
fiyanse. Sinon, koupab la ap peye konsekans la aprè.

Respekte lòd Bondye pase se « wi, amèn ». Tout « men » mennen nan dezobeyisans. Pa gade sou sa w santi, sa k ap fè w plezi, sa tout moun ap fè pou w meprize pawòl Bondye yo paske kretyen an dwe diferan. Li pap gade sou sa moun ap fè pou l viv, li swiv Bib la ki se limyè sou chemen li.

Pa bliye : Moun k ap pouse w nan dife a pa
ponpye!

2. Sèpan an di Bondye pap pini Èv vre

« Se pa vre. Nou pap mouri kras. » (Jenèz 3.4) Èv te plis kwè nan doutans sèpan an te mete nan li ke l te kwè nan lòd Bondye te pase ak pinisyon li te prevwa : « ...jou w manje l, w ap mouri » (Jenèz 2.17).

Se sa ki rive chak fwa yon moun di w fònikasyon pa peche, li pap fè w anyen. An reyalite, sèks bay plezi.

« Sèks bay plezi
Konsa l fè soufri
Sèks bay lavi
Konsa li ka detwi… »

Jan yo toujou di l, « zonbi goute li pa mande rete ». Depi w kòmanse pran gou fè sèks, ou pap mande rete. Konsa tou, lè w kòmanse soufri, sa pap rete. Sèks se yon pratik ki gen plezi menm jan fwi a te gou men pinisyon an pat dous. Se konsa tou fònikatè yo ap jwenn sanksyon. Li bon lè w ap fè sèks men konsekans yo pa dous menm. Sou pwen sa, gen yon bagay enpòtan nou dwe konnen !

Eske Bondye pini tout peche ?

Tout peche se dezobeyisans lalwa Bondye e tout dezobeyisans merite pinisyon, men èske Bondye pini tout peche, tout sa yon kretyen fè ki mal ? Eske Bondye pini chak fwa yon kretyen tonbe nan fònikasyon ?

Li difisil pou nou ta di wi epi demontre li paske antanke lòm, nou pa konn tout bagay. Jan nou te eksplike l nan premye pati a, yon peche ka piti nan je nou, epi se li ki devaste lavi fizik e espirityèl nou. Yon grenn alimèt piti, men li ka mete dife nan yon kay.

Nan sans sa a, sa ka rive kretyen fònikatè a pa wè egzakteman konsekans yon peche men sa pa vle di li pa gen konsekans. Travay di, egzistans lopital, prizon, mòg ak simityè se konsekans peche Adan ak Èv (Jenèz 3.19).

Gen yon rezon pou chak bagay. Lafimen pa soti san dife. Ann pran egzanp sou de vèsè sa yo :

« Si yon moun manje pen sa a, li bwè nan gode sa a san li pa rekonèt rapò pen an ansanm ak diven an gen avèk kò Senyè a, se rale lap rale yon jijman sou tèt li lè lap manje pen an ak lè lap bwè nan gode a. Se sa k fè gen anpil moun malad konsa nan mitan nou, anpil moun kap soufri feblès, san konte sa ki mouri déjà ». (1 Korent 11.29-30)

Ta sanble pou anpil moun, maladi ak soufrans sa yo te natirèl, poutan se konsekans peche yo te ye.

Apot Pòl di yo « se sa k fè ». Gen pwoblèm w ap sibi ki se konsekans peche ou te fè. Ou pa ka wè sa petèt paske ou pa pran tan pou w egzamine l men soufrans nan lavi kretyen toujou gen yon koz (Jak 1.13-15).

Fònikasyon fè anpil moun rate sali yo, kite lekòl, marye ak moun yo pat janm swete, divòse, fè adiltè, trape maladi, fè plizyè pitit yo pa ka okipe…Chak konsekans sa yo ka bay plizyè lòt.

Bondye pa di egzakteman men kòman li pini nou, ni men sa l bannou pou pinisyon men nou konnen tout sa k ap rive nan lavi kretyen an gen pou pi piti yon rezon. Rezon an ka pozitif, li ka negatif. Pozitif si l ap soufri pou sa ki byen (Matye 5.10) e negatif si se pou sa ki mal (1 Pyè 4.15).

3. Sèpan an pat ka defann Èv

Lè Bondye te mande fanm nan poukisa li te manje fwi li te defann manje a, fanm nan di se sèpan an ki te sedwi l. Malerezman, sèpan an pat ka di anyen pou defann li. Yo tou de te jwenn santans pa yo. Konsa tou, moun k ap pouse w fònike a pap la pou mande Bondye gras pou ou. Anpil fwa, li pap menm ede w soufri.

 Zanmi k ap pouse w fònike a pap ede w pran swen pitit ou lè ansent la tonbe.

Ou se pitit Bondye, tout moun k ap pouse w dezobeyi l yo pa vle byen pou ou. Koute sa salmis la te di : « Ala bon sa bon pou moun ki pa koute konsèy mechan yo, ki pa swiv egzanp moun k ap fè sa ki mal, ki pa chita ansanm ak moun kap pase Bondye nan betiz, men ki pran tout plezi l nan lalwa Senyè a, kap repase l nan tèt li lajounen kou lannwit. » (Som 1.1-2).

Yon bon zanmi kretyen pap janm konseye w antre nan relasyon seksyèl avan ou marye. Li konnen Bondye pa vle sa, anplis antanke zanmi w, li pa wete mal pou ou. Lè se Bondye ki di w fè, ou mèt aji je fèmen san enkyete w pou sa lòm ap di men lè se lòm ki di w fè, fò w chache konnen sa Bondye di paske sa lòm di se pa sa li di, e li gen jijman pou ni moun ki te di, ni moun ki te fè.

JDE