PLANIFIKASYON: 6 kesyon pou w planifiye e reyalize yon evenman

Toujou nan lide pou patisipe nan devlopman kominote a, mwen ap pwopoze w jodi a yon atik ki pral ede w reyalize nenpòt evenman: maryaj, fèt, gradyasyon, seminè, konferans, vant siyati, konsè, revèy, reyinyon, elatriye. Mwen swete w pataje l pou lòt moun ou konnen ki ka nan nesesite l. Pa janm bliye plis ou pataje sa w konnen ak moun ki bò kote w se plis ou kontribye nan bon vi ak chanjman nou vle a. 

Avan tou, kisa yon planifikasyon ye?

Planifikasyon se yon pwosesis ki fikse objektif ou (oswa yon antrepriz, yon enstitisyon, yon kolektivite teritoryal...) vle atenn, mwayen ki nesesè pou w fè sa, etap w ap swiv pou reyalizasyon an ak metòd pou fè swivi planifikasyon sa a. Planifikasyon an se òganizasyon nan tan w ap reyalize objektif yo nan yon domèn ki presi, ak diferan mwayen ou mete an aksyon e sou yon dire (ak etap) ki presi (https://fr.wikipedia.org/wiki/Planification)

Gras ak detay sa yo, nou ka konprann de sa ki pi enpòtan nan yon planifikasyon se tan ak objektif ou vle atenn lan. Se sa ki fè, youn nan rezon prensipal ki esplike echèk anpil aktivite se neglijans ki fèt nan tan òganizatè yo genyen devan yo. W ap rann ou kont se souvan nan vèy oswa jou J a, òganizatè yo plis konsyan de responsabilite yo. Sa lakoz patisipan yo pèdi tan e aktivite a pa byen pase. Ebyen, gras ak 6 kesyon sa yo, ou pral kòmanse aprann planifye e reyalize nenpòt aktivite w ap fè epi ret branche tann liv m ap ekri (toujou nan laang kreyòl sou sijè sa a k ap bay plis konesans toujou).

Men 6 kesyon yo:

1. Kisa?

2. Poukisa?

3. Kilès?

4. Ki kote?

5. Kilè?

6. Kòman?

W ap bezwen yon fèy blanch, kanè nòt ou oswa kaye planifikasyon w pou w ekri kesyon sa yo e kite espas pou w reponn yo swa pou kont ou swa ak tout moun ki konsène nan plan an.

 Annou wè kèk detay!

1. Kisa? 

Repons: M ap òganize yon seminè sou savon likid.

 

Li enpòtan pou w konn sa w ap fè a byen pou w pa fè yon lòt. Paske trè souvan, gen moun ki vle reyalize yon fèt men akoz li pa konn egzakteman sa l ap fè a, li pa rive satisfè tèt li ni moun li envite yo. Li enpòtan tou pou w antoure w de moun ki konnen sa w ap fè a pou yo pa ba w move konsèy. Move konsèy la ka gen plizyè sans, men m vle pale de konsèy ki bon men ki pa gen rapò ak sa w ap òganize a. Se trè enpòtan e siksè w vle a depann de tout moun ou enplike nan planifikasyon w ap fè a. Moun k ap ede w òganize yo dwe konn kolabore e pa gen konplèks siperyorite pou yo pa panse w ap kòmande yo lè w di yo fè oswa ale. 

Raple w: M AP OGANIZE YON SEMINÈ SOU SAVON LIKID. 

 

2.  Poukisa? 

Repons: M ap òganize seminè sa pou m ka fòme moun.

 

Li ka gratis tou. Rezon w ap òganize aktivite w la dwe pasyone w e menm priyoritè nan tan ki rete pou l rive a. Kèk fwa, ou jis vle òganize san w pa renmen sa w ap fè a oswa ou dekouraje paske w konnen li p ap rapòte w. Non, ou dwe prevwa sa w ap jwenn kòm benefis: lajan, vizibilite, chanjman, eksperyans. Si w pa konn rezon an, li posib pou w pa mete tout ou menm ladan ki se yon faktè echèk. 

Raple w: M AP OGANIZE YON SEMINÈ SOU SAVON LIKID POU M FOME MOUN. 

3. Kilès? 

M ap òganize seminè m lan pou jèn nan kominote m nan.  

Kilès ou sible nan seminè w ap òganize a? Li ka: jèn, granmoun, elèv, etidyan, pwofesè, pwofesyonèl... Li enpòtan pou w sible moun ou vle patisipe yo paske sinon ou ka depanse kò, tan ak enèji nan fè pwomosyon pou granmesi. Pwiske se yon seminè m ap fè pou elèv lekòl, m dwe vize tout kote m ap jwenn elèv lekòl: lekòl, nan lari lè lekòl lage, nan gwoup travay... Sib ou yo ka ede w detèmine depans ou, deplasman w, lojistik ak tout sa ki ka fasilte w atenn yo pou fè mesaj ou a pase.

Raple w: M AP OGANIZE YON SEMINÈ SOU SAVON LIKID POU M FOME JÈN.

4. Ki kote?

Repons: M ap òganize seminè a nan LA BELLE VIE RESTAU BAR

 

Ou dwe konnen byen e byen chwazi kote w ap fè aktivite w la. Sa ka koute w kòb. Depan de relasyon ou, ou ka benefisye l. Konsa tou, ou ka fè patenarya sou pousantaj nan reyisit aktivite w la. Souvan, kote w chwazi pou reyalize evenman w lan konn tou detèmine reyisit li, tankou nan yon enstitisyon oswa antrepriz ki konèt deja. Nan kote a, fò w tou detèmine adrès la: zòn, ri, nimewo, antrepriz ki nan anviwon an.

Raple w: M AP OGANIZE YON SEMINÈ SOU SAVON LIKID NAN 'LA BELLE VIE RESTAU BAR (LYANKOU)' POU M FOME JÈN. 

5. Kilè?

Repons: M ap òganize seminè a 8 mas 2020, soti 8è nan maten pou rive 2è. 

Kilè se nan ki dat w ap òganize evenman w lan.  Dat la dwe enkli tout sa ki konsène lè, tankou : jou, lè, minit: 8 mas 2020, soti 8è nan maten pou rive 2è. Toutfwa, chwa dat ou a dwe estratejik. Ou pa ka jis chwazi yon dat ki vin nan lespri w. Ou ka konsidere lòt aktivite k ap fèt nan jou a avan oswa aprè, tankou chanpèt, gradyasyon, antèman, maryaj, gradyasyon, konpozisyon lekòl, egzamen ofisyèl, match foutbòl...tout sa k ap òganize nan zòn ou an e dèfwa menm deyò ka gen enpak, pozitif oswa negatif, sou evenman w lan. Kidonk, fòk ou konsidere yo. Mete sou sa, kantite jou soti jou w ap lanse e reyalize aktivite w la enpòtan tou. Egzanp: m ka chwazi lanse aktivite 8 mas mwen an depi 8 fevriye (30 jou avan jou J). Selon sa w ap òganize a, li ka plis oswa mwens. Li depann tou de mwayen ekonomik ou ak kantite patisipan ou vle atenn lan. 

Raple w: M AP OGANIZE YON SEMINÈ SOU SAVON LIKID NAN 'LA BELLE VIE RESTAU BAR (LYANKOU)' POU M FOME JÈN  NAN DAT 8 MAS 2020, SOTI 8È NAN MATEN POU RIVE 2È NAN APRÈMIDI.

6. Kòman?

Repons: Patisipan yo ap bay 500 goud, 150 goud pou enskripsyon. 

Lè yon moun fin aprann yon seminè ap fèt, sa ki pi enteresan pou li se konbyen kòb l ap peye. Nan sans sa a, konbyen an ap soti nan kòman an k ap detèmine kòman l ap patisipe. Kesyon l ap poze: Pou konbyen kòb y ap fè seminè sa a? Pri a ap fè l entèrese oswa dezenterese. Se sa k fè, maketin nan enpòtan paske se li ki pral bay plis detay pou motive e montre avantaj sa w ap fè a. Kòman an se tout prensip ou pral mete pou w patisipan yo enskri, vini, antre, patisipe e benefisye avantaj. 

Men sa ki esansyèl nan seminè m vle reyalize a:
 M AP OGANIZE YON SEMINÈ SOU SAVON LIKID NAN 'LA BELLE VIE RESTAU BAR (LYANKOU)' POU M FOME JÈN  NAN DAT 8 MAS 2020, SOTI 8È NAN MATEN POU RIVE 2È NAN APRÈMIDI POU 500 GOUD.

Se li ki pral gide m fè flyers e se sa tout moun k ap li oswa tande l yo dwe kenbe nan tèt yo.

1. Kisa? YON SEMINÈ SOU SAVON LIKID

2. Poukisa? POU FOME

3. Kilès? JÈN

4. Ki kote? LA BELLE VIE RESTAU BAR, LYANKOU

5. Kilè? 8 MAS 2020, SOTI 8È POU RIVE 2È

6. Kòman? 500 GOUD PATISIPASYON, 150 ENSKRIPSYON

Sa m pa mete nan atik sa a ki mande lòt planifikasyon: fòmatè yo, sa w ap bay patisipan yo: sètifika, manje elatriye. 

Èske atik sa a te ede w? Ou ka pataje link la ak tout zanmi ki nan nesesite l. Se yon bon mwayen pou w patisipe nan siksè moun san w pa rann kont. Se rezon sa a ki te pouse m redije l pou ou, pa kenbe l pou kont ou. 

Jérome Dorsonne Emerson (JDE)
Ekriven/Konferansye/ Fasilitatè nan L.S.
Direktè J.A.S

Le résultat du génie est la beauté, mais ce résultat a un prix!

Un jour, un monsieur qui était fan de Pablo Picasso le rencontre et, très ému, il demande à son idole de lui réaliser un tableau. Picasso prend un petit crayon et un tableau vierge, et en cinq minutes, il lui réalise un très beau dessin. Le monsieur, impressionné par la beauté du tableau félicite Picasso et lui demande :
« Combien ça va me coûter ? »
– ça vous fera un million de francs !, lui répond Picasso.
Le monsieur s’exclame et dit :

– Un million, un million ! Cela vous a pris juste cinq minutes pour le dessiner, comment pouvez-vous me le vendre aussi cher ?
Et Picasso lui répond :
– Non, cela m’a pris 50 ans pour apprendre à dessiner ainsi !

N'aie pas peur de valoriser tes nuits de travail qui ont fait de toi une référence.

Auteur inconnu

10 rezon ki fè gen inisyativ ki komanse ki pa ka fini

Èske pou yon fwa ou pa t patisipe nan yon rankont pou entegre oswa pran yon inisyativ? Se te ka nan zòn ou, nan Legliz ou, nan lekòl ou oswa nan travay ou. Epi, se gade w gade w w pa wè sa ki te pwomèt yo fèt. Moun ki te angaje yo rale kò yo epi tout bagay tounen menm jan e pafwa pi mal. Paske sa vin yon abitid, nou tout vin dakò sou deklarasyon sa a: ANYEN PA JANM KOMANSE POU L FINI ISIT! Men èske se vre? Olye m reponn kesyon sa a, annou wè ansanm kèk rezon ki ka fè non sèlman nou jwenn repons la men pou n pa pran repons yo sèvi eskiz. Se sa ki pi grav la nan yon reyalite konsa. Lè nou konnen pwoblèm yo epi n pran plezi ap pale de yo, eskiz se pi gwo mwayen pou n pa janm rezoud yo.


 1. VIZYON AN PA KLÈ

Yon inisyativ ka yon vizyon. Sa vle di yon sitiyasyon, yon moun nou swete chanje aprè yon tan. N ap viv pwoblèm nan, nou vle konbat li pou n jwenn yon lòt rezilta. Tout moun ki angaje yo nan vizyon sa a dwe byen konprann li pou yo pa dekouraje oswa fè lòt panse ki pral kraze mouvman an. Se sa ki fè, lidè mouvman an dwe byen kominike sa ki nan tèt li a pou tout moun k ap swiv li yo ka konnen kote yo prale. Si vizyon an pa klè, nenpòt moun ka ba l fòm li vle e trè souvan se move fòm yo ki fè plis enpak sou manm yo ak moun ki ta vle sipòte inisyativ la.

2. LIDÈ A PA ENSPIRE MOUN KONFYANS

Swiv yon moun san w pa wè sa l ap di w yo e sitou si l pa ka genyen anyen nan moman l ap fè pwomès la pa fasil. Poutan, se sa ki pou fè yon lidè serye, lè moun kwè nan ou malgre yo pa wè men yo fè w konfyans paske yo konnen ou ka atenn objektif ki vize a. Toutfwa, si w ap aji kòmsi se ou ki ka fè l pou kont ou, w ap pèdi konfyans kolaboratè w yo paske y ap wè kapasite yo, konsèy yo, enplikasyon yo pa enpòtan.

3. LIDÈ INISYATIV LA PA KONN MOTIVE

Fin patisipe nan yon reyinyon ki te trè enteresan gras ak bèl lide pa yon asirans angajman yo pral respekte vre. Se jis yon bon kòmansman men pi fò travay la rete pou fèt aprè. Dayè, pi souvan, lide ki te bwase yo, ou te konn pale yo ak zanmi oswa nan deba deja. Men pa t gen yon lidè ki te pran l fè cheval batay li. Ou menm tou, ou pa t janm wè nesesite pou w fè sa. Ebyen, si mèt inisyativ ou te patisipe a pa gen estrateji pou l fè enèji li te degaje a toujou motive w, domine w, pasyone w, w ap finalman dekouraje. Pi rèd ankò, ou gen dwa pa janm entèrese ak yon lòt inisyativ parèy paske w ap panse se menm penpenp la. 

4. KOLABORATÈ YO PA RESPEKTE VIZYON INISYATÈ YO

Toujou raple w yon vizyon rete yon vizyon. Ou te ka genyen l tou e w te ka mennen l pi byen pase inisyatè a. Men ou pa oblije opoze ak li paske l p ap mennen l jan w ta swete l la. Konsa tou, ou ka itilize estrateji pou w enfliyanse l nan fason pozitif, tankou pwopoze l lide w yo san w pa enpoze yo, fache oswa demisyone. Anpil moun bezwen bay konsèy men yo pa ka fè diferans ant konsèy ak lòd. Tout sa w di w vle se li ki pou fèt pa konsèy, se yon lòd. Si w ap bay yon bon konsèy, ou dwe kòmanse nan respè pou moun nan, answit nan renmen epi nan sajès. Moun nan gen dwa pou rejte konsèy ou a, reflechi sou li oswa aksepte l. Se pa t li menm ki te fè lide w fè a e pa gen anyen ki di l ki plan ki kache dèyè lide w la. Kidonk, li enpòtan pou w respekte vizyon lidè ki nan tèt gwoup a san w pa neglije ede l, sipòte l e konseye l. 

5. RESPONSAB YO PA VLE TRAVAY AN EKIP

Refize travay an ekip se pi gwo pwazon k ap detwi anpil rèv, vizyon, plan ki genyen pou kominote w la, Legliz ou a, gwoup ou a. Li fasil pou konnen rezon ki fè moun pa vle travay an ekip. M ap gen pou m ekri yon atik sou sa pèsonèlman. Pou koulye a, m ta renmen w konnen si manm nan kominote w la pa vle travay an ekip, menmsi vizyon yo a ta pi bèl nan monn lan, li p ap ka reyalize. Sepandan, ou ka gen yon ekip ki pa ka bay rezilta. Sa a ankò se yon lòt sijè pou n trete apa.

6.  PA GEN PLANIFIKASYON NAN PLAN AKSYON YO

Planifikasyon se yon pouvwa. Li ka fè w prevwa tout obstak e prepare pou fè fas ak yo. Malerezman, endisponiblite ak iresponsablite fè anpil lidè pa renmen oswa pa konn planifye sa y ap fè. Se sa k fè menm lè gen lajan, gen moun, anpil aktivite pa ka reyalize. Lè konsa, dekourajman, plenyen, kritik sifi pou kraze tout inisyativ la. N ap viv nan yon epòk kote moun pa gen pasyans, sitou nan sa ki mande yo pou chita, tande, fè lekti. Tout sa k ap fèt dwe planifye pou evite pèdtan, denigreman ak fristasyon.

7. MANK RESPÈ POU PLANIFIKASYON YO

E si ta gen planifikasyon, èske sa vle di tout bagay ap byen mache? Non. Aprè planifikasyon an, moun ki konsène yo dwe respekte plan ki te detèmine a. Premye sa ki pou respekte se lè, aprè se pwotokòl, answit se pozisyon e finalman aksyon ki dwe fèt. Pi gwo enmi planifikasyon se eskiz. Depi w te gentan di 'wi', tout sa k ap lakoz 'wi' sa a vin 'non' pa dwe sou responsablite w, sof nan ka majè, egzanp pou aksidan, maladi. Pwoblèm transpò, blokis se eskiz si koz la se yon abitid. Egzanp, w ap sot Kafou pou vin Pòtoprens, blokis pa ka eskiz pou ou. Ou te dwe deplase yon lè oswa ret pi prè evenman an. Tout sa dwe antre nan planifikasyon an, ou ta dwe prevwa yo pou si sa ta rive pou gentan gen ranplasman.

8. ENPASYANS NAN TANN REZILTA YO

M pa kwè w ap ka konte kantite asosyasyon ki te pran nesans nan zòn ou, poutan prèske youn pa rive atenn objektif yo menmsi yo kontinye egziste. Jodi a m vin di w pi gwo pwoblèm nan se ENPASYANS! Se pa menm tan an ou bezwen pou tann yon diri k ap kwit lakay ou ak yon jaden diri ki fèk plante. Tou de se diri men yo pa pran menm tan. Se konsa pou w wè inisyativ ou fè pati a. Nan konbyen tan sa y ap pale a ap rive? Nan konbyen tan w ap jwenn sa yo pwomèt ou a e ki aksyon ou dwe fè pou w jwenn li? Paske si w kanpe devan yon pòt ap tann li louvri, ou p ap janm antre si se ou ki dwe jwenn kle a epi louvri l. Ou pa dwe ap tann sèlman, fòk ou aji tou. Dayè, lè w ap tann san fè aksyon, sa kreye plis dezespwa. Se pa yon lòt asosyasyon pou n fè, se sa ki la deja yo pou n ranfòse paske si lòt ki la yo pa bay rezilta ak ou menm, nouvo a gen dwa pa bay li tou. Kidonk, avan ou pran yon lòt inisyativ, gade pou w wè si pa gen lòt deja ou ka entegre oswa sipòte pou l reyisi. Lè sa a, li ka sèvi w modèl. Men si nou tout ap fè pa nou paske n pa ka tann, nou p ap janm gen yon egzanp pou n swiv.

9. JALOUZI POU ENPAK VIZYON AN

Tout vizyon k ap reyalize gen yon enpak l ap fè. Si w wè l, sa vle di li ka fèt. E si li ka fèt, ou dwe mete men pou l reyalize. M panse se rezon sa a ki fè w fè pati yon gwoup deja. Jalouzi a pral manifeste sou plizyè fòm, tankou: ou pa entèrese ak aktivite vizyon an, ou swete echèk pou aktivite l yo, w ap denigre inisyativ la, ou sispèk tout bon rezilta, ou minimize siksè l fè e finalman ou kontan paske l pa la ankò. 




10. DIVIZYON
Divizyon an se dènye etap la nan tout sa n soti site la yo. Plis gen gwoup k ap divize, se plis travay nan tèt ansanm nan ap difisil. Ap gen mwens moun ki vle pou sa chanje men plis moun ki pa prè pou kolabore. Divizyon lakoz anpil inisyativ ret nan wout e lòt ki kraze. Poutan si nou ta chita pale sou koz divizyon yo nou t ap wè se feblès nou, inyorans ak lògèy ki fè n pa ka rete ini. Nou dakò viv yon kote n ap mouri ansanm men n refize poze aksyon kote n ap reyisi ansanm. 

Apati jodi a, lè w wè yon inisyativ pa reyisi nan zòn ou an, poze tèt ou kesyon sa a: ÈSKE MWEN PA YOUN NAN RESPONSAB YO? 

JDE