Meditasyon pou jodi a #65: Bondye fidèl nan tout bagay

Wè premye jou nan ane a demontre kòman Bondye fidèl. Se yon gras pou sila yo ki vivan nan jou sa a e se okazyon tou pou yo planifye vi yo. Se kòmsi tout moun sou latè beni te fenk fèt. Gen moun ki bliye move jou nan ane pase a, gen lòt ki pa kapab bliye anyen. Tout moun ap bay swè yo. Sou vizaj pi fò ladan yo, ou wè yon souri k’ap briye. Nan tout bagay sa yo, yo louwe non Bondye pou fidelite li.

Bondye fidèl nan kreyasyon li

Fidelite Bondye kontine egziste menmsi lòm kontinye nye egzistans li. Men sa nou li nan Som : « Tout tan tout tan, w ap toujou kenbe pawòl ou. Ou mete latè nan plas li, l’ap rete fèm. Jouk jounen jodi a, tout bagay sou latè rete jan ou vel l la, paske yo tout se sèvitè ou yo ye » (Som 199.90-91)

Bondye fidèl menm lè nou enfidèl

Apot Pòl di Timote konsa : « Si nou pa kenbe pawòl nou, li menm l’ap toujou kenbe pawòl pa li, paske Bondye pa kapab demanti tèt li. » (2 Timote 2.13). Vèsè sa pa di ke Bondye p’ap pini moun ki enfidèl yo, sa pa tap mache ak moun li ye a. Sa Bondye di ak bouch li, men li yo ap fè l, se vre, men bouch li pale sou jijman. Apot Pòl te ekri kretyen nan Lavil Wòm pou di yo konsa : « Daprè Bòn Nouvèl m ap anonse a, se sa menm ki gen pou rive è Bondye va voye Jezikri pou jije tou sa lèzòm t’ap fè an kachèt “ (Women 2.16).

Bondye fidèl nan pwomès li yo

Delivrans Bondye bannou nan Jezikri jwenn pwoteksyon anba tout pouvwa li genyen. Jezi te di konsa : « Mwen ba yo lavi ki pap janm fini an. Yo p’ap janm peri, pèsonn pap janm ka rache yo nan men mwen. Sa Papa m ban mwen an pi gran pase tout. Pèsonn pa ka rache anyen ki nan men Papa a. » (Jan 10.28-29) Kilès ki defèt sa Bondye fè ? Pèsonn !

Bondye fidèl nan jijman li.

Si se gras Bondye ki fè ou wè premye jou nan ane a, konnen tou ke w ap wè jou jijman an paske Bondye fidèl nan tout bagay. Mwen swete ou pase yon lane nan obeyisans pawòl Bondye a ki se sèl sous k’ap ba w lajwa tout bon an. Chache Bondye ak tout kè w, l’ap kite w jwenn li.

« Mwen chache obeyi ou ak tout kè mwen. Pa kite m dezobeyi kòmandman ou yo. » (Som 119.10)

« N’a chache m, n’a jwenn mwen paske n’a chache m ak tout kè nou » (Jeremi 29.13)

Pase yon bon lane !

Jérôme Dorsonne Emerson