|DEVLOPMAN PÈSONÈL
Yo manipile w lè yo itilize w jan yo vle pou atenn yon obejektif. Yo abize ou san difikilte, e se alafen, w ap rann ou kont ou te nayif.
Nan yon moman nan lavi, nou chak te sibi manipilasyon e li toujou posib pou sa rive sitou lè nou inosan oswa inyoran nan yon domèn. Yon moun ka montre li nan enterè ou epi se mwayen l ap chache pou twonpe w. Konsa, gen anpil moun nan sosyete a yo itilize yo pou reyalize pwojè san yo pa konnen ni benefisye.
Nan atik sa a, nou pral wè sis nan plizyè rezon ki ka fè yo manipile w.
1. Inosans
Lè w inosan, ou pa nwi moun men feblès ou ka yon bon zouti pou yo manipile w paske li rann ou nayif. Ou kwè fasil nan sa yo di w e ou fè sa ki aranje yon moun san w pa wè se ou k ap travay pou malè w.
2. Imatirite
Depi w pa ka reflechi pou w konnen konsekans chwa ou ka genyen nan lavi w, y ap manipile w. W ap tankou yon avèg y ap mennen kote yo vle. Ou pa nan lojik, ou kwè tout sa yo di w e w pa pran konsèy nan men moun k ap klere w.
3. Inyorans
Lè w pa gen konesans nan yon domèn, ou inyoran. Kidonk, tout moun ka inyoran. Ebyen, si w pa entèlijan pou w konnen sa pou w fè lè w inyoran nan yon domèn, yo deja manipile w. Lè w pa sèten de sa w tande, pa kouri reyaji, mande lòt moun, y a fè w konnen.
4. Enstabilite
Ou chanje ide fasil, ou pa gen yon chwa ki defini karaktè w, gou w, kote w vle rive. Sa sifi pou yo manipile w. Nenpòt moun ka fè wpwomès, monte tèt ou jiskaske ou fè move chwa.
5. Mank konfyans
Mank konfyans fè w pa kwè ni fyè de chwa w fè e de moun ou ye a. Ou pa kwè w ka fè anyen ki gran. Sa ka lakoz ou reziye w e se konsa nenpòt moun ap ka mennen w.
6. Alamòd
Ou bezwen posede tout sa ki fèk parèt, nenpòt pri li koute a. Ebyen, y ap pwodwi pou satisfè w. W ap pran nan koukou pou tòt e w ap regrèt lè je w vin klè.
Gen yon gran diferans ant yon manipilatè ak yon lidè. Manipilatè a fè w swiv li pou l ka fè sa l vle e jwenn sa l bezwen tandike lidè a fè w swiv li pou l ka atenn yon objektif k ap bon pou tout moun.
Èske w santi yo te manipile w deja?
Ki youn nan sis pwen sa yo ki te lakoz?
JDE
Eske yon moun ki souvan ap ba w mwatye verite ap manipile w pou sa?
RépondreEffacerWi e non. Sa depan de entansyon li genyen an. Si se pou l pwoteje w, se pa manipilasyon men si se pou l jwenn oswa pwoteje enterè pa l, se manipilasyon.
EffacerNan yon relasyon ki entim, yon moun ki pa ba w tout verite a, ap pwoteje w oubyen ap detwi relasyon an?
EffacerSa pral depan rezon ki fè l pa ba w verite a. Gen diferans ant yon sekrè ak yon manti. Yon manti ka kache yon verite ki se sekrè men li ka jis yon imajinasyon. Sekrè a se yon verite ki pa devwale pou yon rezon.
Effacer