Pawòl ou ak aksyon w: kisa ki plis konte?

M sonje lè m te gen 15 lane yo konsa, te gen yon patnè ki te pi gran pase m. Pandan m t ap mache, li t ap menase m. M ba l yon presyon atout m te pè. M di l depi l manyen m, m ap goumen ak li. Pou rezilta, li ban m yon zoklo nan mitan tèt mwen. M met men sou tèt mwen, epi m di : ou wè, ou wè? Li gade m epi l kontinye wout li. 

M te panse pawòl mwen te ka fè l pran presyon men se te byen konte mal kalkile. Aksyon misye te fè wè pawòl mwen yo pa itil anyen. Se te laperèz ki te kache dèyè yo. Li menm, malgre li pa t pale, li te montre li pa pè ak sa li ka fè. 

Èske se pa menm bagay la ki rive w lè w pale epi moun ki fè silans yo ap demanti w, dezapwouve w, antre nan patiraj ou pou defye w? 

Si gen konesans bay konn pale, ki enpòtans li anfas moun ki konn aji e k ap aji kontrèman ak enpak pawòl ou ta dwe genyen. 

M panse l enpòtan pou nou reflechi avan nou pale nonsèlman pou n konnen sa n ap di men pou n pa fè bak lè sitiyasyon an mande pou nou aji. Paske, sa pa itil anyen si w pa ka fè sa w ap di a. Plis pa itil, si w pa ka ede moun k ap aji yo nan aksyon yo. 

Pawòl nou yo enpòtan men lè nou fè sa nou di, li pi enpòtan. 

JDE

Leson pou ou menm ki gen pou w paran

Jeneralman, nou chak k ap viv se pwodwi relasyon seksyèl yon gason ak yon fi. Se Adan, Èv ak Jezi ki pa t fèt nan prensip sa a. 

Nòmalman, si w pòv pandan w ap li tèks sa a se petèt pwoblèm paran w ki te pòv oswa ki te gen lajan men ki pa t chwazi prepare pou ou. Sa fè, w ap viv yon lavi w pa dakò, ou pa t swete e w ap goumen non sèlman pou sa chanje men pou pitit ou pa viv menm jan ak ou. 

Leson m nan pa lwen. 

Antanke papa de (2) pitit gason, m pa gen pou m ap plenyen pou preparasyon paran m pa t fè pou mwen. M p ap di se volonte Bondye pou mwen paske Bondye pa voye pèsonn vin viv nan lamizè. 

Si m pa ka pitit gason m te swete ye paran yo m yo, m dwe travay pou pitit mwen yo vin pitit papa yo vle yo ye a. Si w pa ka pitit fi ou te swete ye pou paran w yo, devwa w se travay pou pitit ou yo vin pitit ou pa ka ye a. 

Pa kondane paran w paske yo pa t fè ase preparasyon pou ou. Li posib pou gran paran yo e gran gran paran yo pa t fè l tou. Ou pa ka defèt sa, men w ka anpeche sa fèt pou ou. 

Jodi a, ou nan plas pou w kritike papa w, sonje demen ou pral papa. Jodi a, w ap pale manman w mal pou sa li kite rive w, sonje demen ou pral manman. Kisa w ap fè pou pitit ou pa di w sa w ap di jodi a? Ki plan w genyen pou pitit ou pa fè sa w ap fè jodi a? 

Kisa w genyen ak sa w pa genyen? Ki kote w ye parapò ak kote w te dwe ye? Pa panike! Se moman pou w panse kisa w pral fè pou byenèt pitit ou a.

Si mesaj sa a te touche w, pataje l bay tout jèn ki gen pou vin paran. 

JDE

Kat rezon pou w pa swete echèk yon moun

Jwenn moun pou ede w, korije w pou avanse difisil. Inyorans, jalouzi ak rankin fè gen plis moun k ap gade e pale pase sila k ap lonje men pou ede.

Èske sa rive w deja pou w swete oswa panse zanmi w lan, kamarad ou a oswa konkiran w p ap janm reyisi nan lavi l paske li pran twòp echèk? Men kat rezon ki ta dwe fè w pa janm gen yon ide konsa.

1. Tout siksè ak echèk ka lye ak ou

Si machann k ap vann pate nan ri w la te fè lavant chak jou, ou te ka pwofite mete yon komès ji natirèl kote l la. Plis gen moun k ap echwe se mwens ap gen moun k ap gen mwayen pou sipòte sa w ap fè. Kidonk, swete siksè tout moun k ap travay se pou byen w.

2. Ou pa Bondye jistis 

Ou pa la pou jije kilès Bondye dwe fè favè ou pa. Pou leson, san favè li, ou pa t ap gen ni souf ni pawòl pou w predi lavni yon moun. Chak fwa w jije yon moun p ap janm anyen akoz yon echèk, mande tèt ou si w gen plis rezon pou w reyisi. 

3. Demen gen anpil sipriz

Jodi a, ou estime w pa bezwen sèvis yon vwazen, yon benevòl, yon zanmi sou katye w la paske li pa diy. Pa janm bliye demen ka pote sipriz nan lavi moun sa ki ka fè l vin nan plas w ap bezwen l. Aprann se ou k ap konstwi jennen w chak fwa w rejte yon moun pou eta aktyèl li.

4. Gen erè, gen echèk, gen pwogrè 

Erè ka fè Tijan echwe men si Tijan pèsevere li ka fè pwogrè. Tout gwo chofè te aprann kondi yon jou. Ou ka pa wè pwogrè yo, men anpil fwa se rezilta final la ki ba w sipriz.

Gen yon otè ki te di :" Evite echèk yo se evite pwogrè". Dezòmè, lè w wè yon moun ap echwe konnen l ap fè pwogrè an menm tan. 

#Pwogrè #Echèk #Dekourajman #jijman

JDE

Chronique d'une âme endolorie

La nuit tombe sur la cité 

Comme une fumée infernale 

Qui s'abonne 

Aux fins de mes journées

Ce sentiment du carnage 

M'espionne 

M'environne 

Et me met sur mes pieds de vigile 

Ce soir, comme beaucoup d'autres,

Le sommeil s'éloigne

Mes doux rêves me manquent

Mon esprit n'a pas de repos

Ô pauvre gardien!

Le silence me transit

Mes compagnons aboient

La reine et les princes roupillent 

Je courtise l'heure 

Et je suis tellement impatient 

De pouvoir entendre les pas du jour 

Qui revient au son des cocoricos

C'est une vie de mort 

Une mort pleine d'envies 

Hier, j'ai entendu parler d'espoir 

Aujourd'hui, je veux le voir 

Afin de connaitre sa couleur 

J'ai soif de le toucher 

Pour que mes pétoches 

Se retirent de mon esprit

JDE

Hommage à mon humanité

Je ne suis pas supérieur que toi

Je ne suis pas inférieur que toi

Je ne suis pas ton égal non plus 

Je suis unique 

Je suis incomparable 

Je suis moi 

Je suis spécial

Je suis une créature merveilleuse

Ne me demande pas de devenir toi

Ne me demande pas de devenir un autre 

Ne cherche personne en moi 

J'ai le sang de mon père 

Pas son caractère et son sentiment 

J'ai deux fils mais pas deux moi

Ne te pose plus de questions 

Je suis moi-même 

Parle pour que je t'entende 

Car j'ai des oreilles 

Juge-moi en face, 

Car je peux me défendre 

Désolé, si je ne suis pas 

L'esclave ou la copie espérée 

Tu trouveras sûrement 

Quelqu'un qui te plait

Que tu aimes

Il n'est peut-être pas en moi 

Mais, tu le trouveras, 

Mais je ne le deviendrai pas 

Pour te plaire comme un robot 

Cherche, cherche, cherche encore

Il y a sept milliards de possibilités 

Pour ta gouverne, je réduis le nombre

Point besoin de voir éteindre ma bougie

Je ne suis pas responsable de ta malchance 

Ni du temps-jamais qu'il te faudra 

Pour admettre mon originalité 

Aime-moi 

Sinon, oublie-moi 

Nous serons tous gagnants 

JDE

29 juin 2020

Kontinye

Kontinye fè sa w ap fè a! 

Si yo di w li enposib 

Pran sa pou motivasyon 

Pa pèdi liy ou

Pa pèdi ekilib ou

Si yo pa vle 

Si yo pa dakò 

Si yo pa vini 

Si yo pa ede 

Kontinye 

Paske se nan pèseverans ou 

Siksè w ye

JDE

Inyorans ou pa fè w gen rezon

Yon moun ki inyoran se yon moun ki pa t resevwa enstriksyon sou sa li pa konnen an. Li ka inyoran tou nan sa li te dwe konnen. Egzanp, si w se enfòmatisyen, ou dwe konnen "souris" se "mouse" an anglè. Sinon, ou se yon inyoran men w pa inyoran nan menm nivo ak yon moun ki pa menm ka ouvri yon òdinatè. Yo itilize mo inyoran an pou defini moun ki iletre tou, tankou yo di yon pèp inyoran. 

Si inyorans te ka fè w gen rezon, nou t ap oblije konn tout bagay pou n te ka viv e pèsonn pa t ap janm gen tò pwiske trè souvan, se inyorans ki fè w fè sa ki mal oswa fè move chwa. 

Ann pran egzanp yon moun ki grangou e ki antre nan yon restoran li mande pou yo sèvi l. Aprè, li leve ale san peye. Si li gen rezon, konnen li fou men si l antò, se swa li pa t konnen pou l peye oswa li fè l eksprè. Ke se eksprè oswa inyorans, li koupab. Toutfwa, li te dwe konnen manje nan restoran pa bay gratis. 

Gen pawòl ou di ki se verite men se inyorans ou ki fè w di l. Ou pa t konnen se pa nan moman an pou w te di l. Nan bezwen di verite pou yo wè w gen kouraj, ou di l men se inyorans ki lakoz. Nan sans sa a, sa ka rive nou tout. Se eksperyans ki pral fè nou konnen sa ki bon ak sa ki pa bon parapò ak rezilta negatif oswa pozitif li bay. Kifè, gen konesans w ap genyen gras ak eksperyans, gen lòt se refleksyon, lekti ak sajès k ap ba w li. 

Yon dènye egzanp! 

Gen moun k ap mouri san konvèti nan inyorans menm jan genyen yo tiye akoz inyorans yo. Lè konsa, nou rele dezyèm kategori a inosan men chak moun k ap viv dwe konnen pou l konvèti pou l ka gen lavi etènèl. Si l pa konvèti paske l pa t konnen, li mouri inyoran men sa pa vle di l ap gen rezon nan jou jijman an. Inyorans li pa ka sèvi eskiz. 

Li enpòtan pou nou toujou chache konnen pou n pa viktim akoz inyorans nou paske se pa tout lè pa konnen ka sove nou. 

JDE