Meditasyon pou jodi a #86 : Yon panse pou Ayiti

Pale de Ayiti, se pale de ayisyen : gason ak fanm ; timoun, jèn ak granmoun. Ayisyen yo se kreyati Bondye, se pou nanm yo Jezi te vin mouri tou.

Mwen pa gen mo [maten an] pou m pale de lanmou mwen, enkyetid mwen yo ak sa mwen swete pou ou, men mwen imajine ke se menm bagay la ki rive’w tou, paske nan jou malè a, se nou tout k ap nan kouri. Nou chak ap bezwen lòt. Genyen moun k ap kontan pou yon tan, men gen yon tan k ap vini, moun sa yo pral kriye.

Kisa sa ta sèvi m pou m gen kè kontan si pa gen pèsonnn pou pataje kè kontan sa a ? Eske se pa egoyis ? Poukisa m ap viv kot frè mwen yo ak sè mwen yo nan chagren si yo pa ka konsole mwen? Eske se pa imilyasyon?

Si gen nan nou ki retire nepe li pou yo atake, gen lòt moun k ap blese. Men si yo bay vag, p ap gen pyes moun blese. Konsa, sa ki mal ak sa ki byen depan de nou. Tèt ansanm ak divizyon depann de nou, paske tèt ansanm ak divizyon pa moun. Yo se santiman ki ka rete nan moun.

Filozòf la di : « Lè ou pa pran konsèy, plan travay ou p ap mache. Lè ou pran konsèy nan men anpil moun, ou mèt sèten travay ou ap mache byen » (Pwovèb 15.22) Li di ankò : « Lèzòm fè lide nan kè yo. Men, dènye mo a nan men Bondye » (Pwovèb 16.1).

Ke Bondye beni Ayiti !

Pase yon bon jounen !

Jérôme Dorsonne Emerson