Meditasyon pou jodi a #96: Konfizyon

“Glwa pou Bondye pou 31 meditasyon li te pèmèt mwen fè pandan mwa janvye 2016 la. Nan 4 jou ankò, se pral 100 depi 28 oktòb 2015 »

Obstak ki gen nan lavi n ap mennen nan Kris la (twazyèm pati)

Men sa ki ekri nan Bib la : « Nenpòt moun ki mete konfyans yo nan li p’ap janm soti wont. » (Women 10.13) Tout bagay te kòmanse nan evanjelizasyon, epi nan konvèsyon ak batèm dlo, finalman ak yon bann doktrin k’ap simen konfizyon nan mitan kwayan yo. De bagay lakoz pwoblèm sa a : anseyan yo pa ka moutre lòt moun yo byen (2 Timote 2.2) ak yon bann prensip lòm ki mete otorite Bib la dekote (Matye 15.9).

Li sanble jodi a ke chak legliz ap sèvi yon Bondye depaman. Predikatè yo ap itilize yon sèl Bib men yo divize sou sa ki ekri ladan an. Yo konn menm vèsè, men yo chak entèprete l fason pa yo. Sa pi mal lè ou wè de predikatè ki vle montre verite y’ap di yo nan menm Bib sa a. Si youn pa aksepte opinyon lòt la, men kòman sa ap fini : « Kwè l jan’w vle, mwen m ap kwè l jan m vle ». Poutan yo tout konnen verite sa a: “ …yon sèl Lespri a ki fè tou sa. Li bay chak moun yon kado diferan jan li vle » (1 Korent 12.11).

Olye pou nou preche moun Kris pou yo ka sove, nou kenbe yon deba sou TRINITE ki la depi nan lane 300 avèk Tertullien. Premye sipriz la se lè w konstate nan yon Bib yon nòt ki fè kwè ke mo TRINITE a pa egziste nan Bib. Poutan, doktrin sa lakoz layèn ant legliz yo, yon layèn ki pap fini avan Jezi retounen. Imajine ke TRINITE a pa ta vre, èske sa pap lakoz moun k’ap defann li yo pèdi ? E si li ta reyèl, poukisa li difisil konsa pou konprann li jiskaske nou di li se yon mistè ?

Yon sèl relijyon : krisyanis, ak anpil legliz ki pote chak yon non diferan. Yon sèl Bib ak anpil tradiksyon. Yon sèl legliz ak anpil pastè. Yon sèl Kris e yon sèl esperans ak anpil pwomès ; talè w tande se pou latè, yon lòt lè se pou syèl. Moun sa a kwè nan kontinite lalwa, lòt la kwè nan akonplisman lalwa ki pase mayèt la bay lagras.

Kisa ki lanfè a ? Ki kote li ye ? Eske ou ka sove epi ou pèdi sali a aprè ? Kòman pou yo bay repa Senyè a : nan yon koup oubyen nan plizyè tivè ? Eske Mari se kreyati oubyen manman Bondye ? Chak moun ap sa li panse e panse li yo tounen doktrin lè w pa kwè.

Antouka, konfizyon an pa la depi ayè pwiske nan lavil Galasi, legliz yo te divize sou kesyon lalwa ak lafwa. Pòl te te obilje ekri yo pou di yo klèman ke yon moun k’ap preche yon lòt levanjil ke sa l te preche a tap tonbe anba madichon. Pou rezon sa a, ki avni moun sa yo ki nan konfizyon ? Eske yo pap tonbe nan menm twou ak avèg k’ap egare yo a ? Eksperyans lavi n’ap mennen nan Kris la ap kontinye, n’ap tann rezilta final la nan jou jijman an.

Ke Bondye louvri je ou nan mwa fevriye a pou w ka wè limyè ki klere vrè chemen ki mennen kay Papa a !

Soli Dei Gloria ! Maranatha !

Jérôme Dorsonne Emerson