|SOSYETE
Paul Claudel, poèt, dramatij e diplomat fransè (1868-1956), te di konsa: "Gen yon tan pou w pran e yon tan pou w kite yo pran". Ta sanble gen moun k ap chache sèlman men ki pa janm vle kite pèsonn pran nan sa l jwenn. Sa rele egoyis.
Bò kote Filozòf la, nou jwenn pawòl sa a :"Tout moun fèt pou yo manje, pou yo bwè, pou yo jwi sa travay yo rapòte yo. Sa se kado Bondye ba yo." (Eklezyas 3.13) Alò, reflechi byen, èske w t ap jwenn si pèsonn pa t genyen? Pouki w pa vle bay lè w genyen?
Èske w konnen anpil fwa ou pa jwenn se paske w pa bay? Akoz w ap plenyen, ou pa ka wè valè w, enpòtans ou ak kapasite w. Sa fè w panse se moun ki dwe ba w sèlman pandan ou ka jwenn si w bay nan sa w genyen.
Pa gen moun ki pa genyen pou l bay. Si w panse w pa gen pou w bay, konnen ou egoyis. Kou di Lucien Guitry, yon komedyen fransè (1860-1925), "egoyis la se moun ki pa anplwaye tout minit nan lavi l pou l asire bonè tout lòt egoyis yo". Sa vle di, egoyis pa viv ere e se konsa li kontribye nan malere tout lòt egoyis.
Alò, chak fwa w panse se ou sèlman ki bezwen, ou inyore tout moun ki bezwen sa w genyen. Ebyen, si w pa vle bay, gen sa w p ap janm jwenn. Alò, lisa w bezwen? Kisa w ka bay?
JDE
Aucun commentaire:
Publier un commentaire