Poukisa paran w jalou?

|EDIKASYON SEKSYÈL

Paran w pa ba w levasyon pou w vyole prensip li yo. Sinon, li pa t ap enpòtan e li t ap kite w fè sa w vle. Alò, si li te pran responsablite li nan ba w sa w te dwe konnen, l ap atann w ap mete yo anpratik pou w ka vin moun ou dwe ye a.

Pou sa rive, fòk ou fidèl ak prensip li yo. Ebyen, chak fwa ou nan yon pozisyon, ou fè yon zanmi, ou gen yon konpòtman ki ale kont
prensip sa yo, li pè pou ou. Se sa k fè, lè li aprann yon moun ap koze avè w, ou renmen an kachèt, enkyetid li manifeste nan plizyè santiman tankou kòlè ak dout. Se kèk nan santiman ki ka mennen joure, vyolans, entèdiksyon, pale anpil ak tout sa w konn wè oswa konn sibi yo.

Se pa mechan paran w mechan, li pa egare tou, li pè pou ou. Malerezman, se pa tout paran ki konn kòman pou jere kòlè yo lè y ap fè jalou. Si w konnen sa, se ou ki pou evite sa. Ou pa dwe eksite paran w, depase limit li ba w. Lè konsa, se ou ki sous fristasyon li yo e ou ka viktim
pou lavi nan reyaksyon li.

Se dwa paran w pou l jalou nan sans sa a. Ou pa dwe wè sa mal. Paran ki pa sousye de ou a p ap janm di w anyen. Kèk timoun wè se libète, paran yo koul paske yo pa janm montre yo jalou. Se pa sa li ye tout bon. Paran w dwe yon gid pou ou, yon pwotektè, yon egzanp e nan anpil ka, yon konfidan.

Ou pa oblije di li tout sa ki nan panse w, tout sa w ap fè men si w santi w gen dout sou yon moun ou renmen oswa k ap fè w menas, ofri w lajan, premye moun pou w konfye sa se paran w.

Jérôme Dorsonne Emerson
In "ÈSKE W PRÈ?" PDF
paj 26-27

Kisa ki ka fè yon ti gason di l renmen m?

|EDIKASYON SEKSYÈL

Pou n kòmanse, ann raple nou renmen se yon santiman dwòl. Pi souvan, ou wè l parèt san w pa konn kote l soti. Pafwa, menm moun ki renmen w lan pa ka esplike sa. Li jis santi san li ale ak ou epi w domine lespri l depi jou li te wè w.

Konsa tou, pou pouse w reponn li rapid, moun nan ka ba w rezon li konnen k ap fè w plezi. Lè sa, li di w sa w vle tande, sa l konnen k ap fè w kontan epi se la li twonpe w. Men kòman w ap fè konnen sa? Se sa ki difisil la. Toutfwa, ban nou atire atansyon w sou 11 rezon ki ka fè yon ti gason renmen w:

Pa gen yon rezon ki 100% akseptab. Egzanp, ou ka bèl epi li renmen w pou sajès ou.

1. Bote fizik ou

Bote yon fi se souvan premye siy ki fè yon gason renmen l. Se sa k fè majorite fi konte sou bote yo. Genyen menm ki neglije konesans pou jere l.

2. Bèl vwa

Fi souvan gen bèl vwa ki fè lè l ap pale, gason renmen tande l. Sa sifi pou li renmen w.

3. Koulè w

Renmen pou koulè po plis kay fi pase kay gason. Toutfwa se pa koulè a ki pi enpòtan, li atire gason an sou lòt kalite ki lakay ou. Kifè, si se bèl koulè w genyen, nwa oswa wouj..., fò w travay lòt kalite lakay ou tou.

4. Yon pati nan kò w

Se ka bouch ou, cheve w, sen w, fès ou yo, vant ou, men ou, pye w oswa nen ou. Se pa bagay moun ki renmen an ka fin esplike w sof pou pati jenital ou ki ka fè w panse se pou sèks.

5. Sajès ou

Lè yon fi saj, ke l parèt bèl fizikman ou pa, yon gason ka renmen l. Se yon kalite tout fi ta dwe kiltive.

6. Entèlijans ou

Sitou nan lekòl oswa inivèsite, si w entèlijan, gen gason ki pa bezwen lòt rezon pou l renmen w. Men, se pa lekòl sèlman ki montre moun entèlijan. Nan yon metye, nan komès, ou ka entèlijan tou.

7. Talan w

Ou konn chante, ekri, danse, fè desen, manje oswa pwodwi patisye? Ou ka atire yon gason men w pa oblije renmen ak tout moun ki renmen w pou talan w.

8. Tay ou

Ou kout, wo, seksi, gwo, nòmal, sa yo sifi pou fè yon gason renmen w. Alò, pa devalorize tèt ou di yon gason pa renmen w pou jan w ye. W ap jwenn yon lòt.

9. Yon senp jès

Pandan yon rankont, yon jounen, nan Legliz la, lekòl la oswa nan zòn ou an, yon senp jès ka fè yon gason kòmanse swiv ou.

10. Enterè

A wi! Pou sa w posede, byen oswa lajan, yon gason ka renmen w. Renmen an ka vrè men l plis fo.

11. Kouraj ou

Ou pa timid, ou gen kran pou w pale pou w di sa w panse san krenn kwayans oswa pòs pèsonn. Se yon bon rezon ki fè gason bezwen genyen w.

Sepandan, tout gason nan monn lan ka gen dimil rezon pou renmen w, ou pa ka anpeche sa men w ka fè chwa w selon gou pa w, valè w, konsepsyon w, kwayans ou. Pa janm bliye sa: se pa sa yo di w, se sa w santi, sa w vle...


JDE

C'est facile mais pas aussi facile

|MOTIVATION

Le facile chez un génie est le résultat d'un talent tandis que chez une personne qui pratique un art quelconque, c'est le résultat de l'expérience.

Pense à un guitariste, tu vois que c'est rien de manier six cordes de plusieurs casiers pour obtenir une harmonie.

Maintenant, prends cette guitare et refais ce que tu as entendue.

Challenge!

Je parie que tu ne vas même pas essayer de toucher à la guitare, sauf si tu es aussi un.e guitariste.

La facilité est le résultat de la pratique. Alors, si tu persévères dans la pratique d'un art, tu peux devenir le.la meilleur.e.

Jérôme Dorsonne Emerson

Ede JDE touche 10 mil timoun!

|EDIKASYON SEKSYÈL

Èske w kwè tout bon vre gen anpil timoun, sitou tifi yo, ki pa resevwa edikasyon seksyèl an Ayiti?

Si n ta pran pou n pale de sa, jounen an pa t ap sifi paske nou gen anpil prèv e sa p ap chanje, se ogmante l ap ogmante. Ou ka remake nan zòn ou oswa nan lòt zòn, tifi ap ansent depi laj 14 lane. Parapò ak mwayen ki pa genyen, se to analfabetis, chomaj, ensekirite alimantè k ap ogmante k ap frajilize sosyete a chak jou. Anpil deba fèt sou sa men kanta pou aksyon an, pa genyen l ase.

Se poutèt sa, m chwazi touche 10,000 ti gason ak tifi nan yon mesaj ki trè senp nan yon tiliv ki titre "ESKE W PRÈ?". Se yon dyalòg tèt frèt ak tout timoun ki gen laj pou renmen e li kreyòl. Ladan, m fè yo wè enpòtans otorite ak konsèy paran yo, poukisa Bondye te kreye yo e yo gen pou renmen ak fonde fwaye yo menm jan ak paran yo.

ESKE W PRÈ gen sèlman 20 paj nenpòt timoun ka li nan 60 minit pou pi plis. Paran li oswa nenpòt moun ka mande sa l aprann e m garanti w, l ap jwenn kichòy. Se vre, ti liv sa a pa sifi pou touche tout timoun ni tout sa ki konsène edikasyon seksyèl men li se yon boustè, yon zouti nenpòt paran ka itilize pou akonpaye pitit li nan chwa l ap fè bonè avan li ta jwenn move konsèy.

Mwen menm ak ou gen 3 posiblite pou rive touche 10,000 timoun sa yo:

1. Pwodwi liv
2. Distribye liv (sou fòma papye oswa PDF)
3. Ankouraje timoun ki nan zòn ou li l

Si w entèrese, ou ka kontakte m pou plis detay. Pou w li liv sa a sou telefòn, ou ka klike la a pou w Telechaje ESKE W PRÈ? gratis!

Nou pa ka fè edikasyon seksyèl tout timoun, men nou ka fè pa sa ki pi prè nou yo. Volonte sèlman nou bezwen!

Jeunesse et Lecture
Dawou 2020

Ou pa bezwen kretyen pou w fè abstinans seksyèl

Fè abstinans seksyèl pa yon kesyon fòseman kretyen, se tout jèn ki vle prepare avni yo ki dwe evite antre nan relasyon seksyèl avan yo marye. Kidonk, ou pa oblije kretyen pou  w pa nan fè bagay. Ou jis pa fè l pou evite danje sa yo:

1. Ansent avan lè
2. Kanpe nan etid ou
3. Trape enfeksyon moun pran nan rapò seksyèl
4. Marye ak yon moun ki pa t destine m
5. Divòse paske m pa ka viv ak konjwen m
6. Pèdi vrè sans renmen

Danje sa yo pa pou kretyen sèlman, se pou tout moun yo ye, kit se nonkwayan, vodouyizan, mason, elt. Kidonk, li enpòtan pou ou menm ki jèn, k ap etidye, k ap aprann metye pou w pwoteje tèt ou kont yo.

An reyalite, se pa ansent la ki pwoblèm nan men se preparasyon pou w pran swen pitit la, paske Leta ni Legliz pa gen kès pou pran swen timoun san papa. Se sa l te ka ye men fòk nou menm jèn nou kale je nou pou n wè kòman nou te pase mizè pou n san ye jodi a epi nan kèk segond pou tout lavi nou vole nan yon senp plezi ki dire kèk minit.

Pa koute moun, tankou Rock Fam di l, k ap di w pa gen yon bagay pou w pèdi. Kwè m, se vye entansyon ki nan tèt yo. Toutotan w ap bay, toutotan y ap pran...se sa k montre ke yo jèn jan.

Fè sèks se yon aktivite nòmal paske se Bondye ki te fè lòm ka fè l. San sèks, mwen menm ak ou pa t ap egziste. Se Bondye ki te pase Adan ak madanm li Èv pou yo fè pitit. Kòman sa t ap fè posib si pa t gen sèks? Ki sans maryaj t ap genyen si mari pa t konnen li t ap la fè sèks ak madanm li? Anfen...

Sèks bay plezi e li motive moun fonde fwaye. Men konsa tou, jan Jacky 2 Regle di l, sèks bay plezi konsa l fè soufri, sèks bay lavi konsa l ka detwi. Kidonk, panse ak konsekans chwa w ap fè lè w tonbe nan fè sèks pou w pa bay leta, paran w, legliz responsab pwoblèm ou.

Pa bliye Bondye ba w entèlijans ak volonte pou w viv. Pa fin gaspiye jenès ou pandan w gen fòs pou demen feblès ou pa fè w reziye w viv.

Kenbe diyite w
Kenbe kò w
Kenbe prestij ou

Avni Ayiti,
Avni Fanmi w
Avni w nan men w

JDE
© Jeunesse et Lecture
4 septanm 2019

Ou la pou w etone e non detwone moun ki egri

|MOTIVASYON

Bay tèt ou minimò 2 ak 3 moun pou li, tande oswa gade e reyaji ak sa w ap fè. Epi fè efò, selon sa w ap fè a, pou w fè yon bagay chak jou, an piblik oswa an prive.

Konsantre w. Ret fokis. Pasyone. Vin fou. Konsakre w. Fè erè. Mande konsèy. Korije. Aprann. Li. Swiv. Fè silans.

Nan yon ti tan ankò, 2 a 3 moun sa yo ap mennen 10 a 20. Pa gade foul la. Vize 10 moun ou santi ki konprann ou, valorize w, sansib pou ou, respekte e apresye w. Se yo k ap fè w konnen w ap pwogrese.

Pa janm bliye sa! Pwogrè w pi enpòtan pase bravo. Si w kenbe prensip sa a pou lontan e san rankin, chalbari, mepri, desepsyon, dout gen pou tounen pi gwo sous motivasyon pou fè w grandi e pete plafon.

Pa kite anyen ni pèsonn fè w tire revanj lè w atenn objektif ou paske istwa w, pakou w, eksperyans ou twò bèl pou l fini nan medyokrite ak divizyon.

OU LA POU ETONE MONN LAN MEN PA POU DETWONE OKENN EGRI AK JALOU!

JDE

10 rezon ki fè yon moun fè silans

|KOMINIKASYON

Si nan Talmud la (Liv jwif yo), li ekri: "Pawòl se ajan,  silans se lò", sa vle di, silans koute chè. Kidonk, lè yon moun pa di kwit, li pa fè gaspiya e li gen kichòy pou vann. Ebyen, vin nou founi lespri gade pou n dekouvri 10 machandiz ki kwoke kay moun ki fè silans.

1. Li pa gen repons la

Pa gen okenn wont nan pa konnen, sitou lè w pa t pran pòz ou te konnen tout bagay. Silans se mwayen ki ka montre sa.

2. Li imajine w pa vo repons la

Lè konsa, li gade w (li ka souri tou) epi l souke tèt li paske li wè sa li ta di w men domaj, djakout ou pa ka kenbe repons la.

3. Li wè repons la twò fasil

Pafwa, pito w fè tankou w pa konnen lè w reyalize sa yo panse w pa konnen an gran. Silans ou ka fè yo doute de ou men se nan dout sa a yo pral konn kisa w ye tout bon.

4. Li pa vle ba w odyans li a

Yon pèsonaj piblik ki gen yon milyon moun k ap swiv li ka pa vle reponn ou pou kesyon w lan oswa pozisyon w lan pa parèt enpòtan. W a jije si l bon ou pa.

5. L ap tann yon lòt okazyon pou l reponn ou

Nan moman ou poze kesyon an, ou fè deklarasyon an, li gen dwa pa deside reponn ou pou yon rezon pèsonèl. Men sa pa vle di l inyore w.

6. Li kite nati a ba w repons la

Gen pawòl ou di se akoz inyorans ou, imatirite w oswa awogans ou. Pèsonn pa bezwen reponn ou, nati a ap ba w li nan yon evenman oswa yon okazyon ou pa t menm imajine.

7. Li voye w reflechi pou w jwenn li

Gen repons ou pa jwenn ki fè w reflechi e ki voye w al fè rechèch. Sitou si w jije moun sa a dwe gen repons la. Ebyen, yon ti jès sifi pou l ba w devwa.

8. Li pa vle fè w wont

Dèfwa, se pa moun nan ki fè w wont volontèman. Repons kesyon w lan ki fè l natirèlman. Kisa ki fè w poko fè pitit? Silans!

9. Li meprize w

Pou yon kesyon ki pa konsène w paske yo pa t mande w konsèy, meyè reyaksyon yo ka ba w se meprize w pou w aprann pa antre nan sa ki pa gade w.

10. Li pare yon kou pou ou

Awi!!! Gen moun ki pa reponn ou paske w plis merite yon baton pase yon pawòl. Sitou lè se paran w. 😄 Gen kesyon w poze, li mare figi l epi l ba w yon kout je. Ou mèt tann pita, w ap jwenn repons la.

Antouka, si silans se lò, plon pou kèk ekriven tankou Hervé Bazin, silans konn pale. Lè konsa, ou jwenn ajan ak tout lò. Konsa tou, se pa tout lè pou w fè silans paske silans konn vle di konplis.

M ap kite w ak de sitasyon sa yo:

"Silans kenbe tout verite yo; lapawòl pote tout manti yo" (Jacques Ferron)

"Chak pawòl gen yon konsekans. Chak silans gen konsekans pa l tou". (Jean-Paul Sartre)

(Ou konnen yon lòt rezon? Mete l nan kòmantè a)

Jérôme Dorsonne Emerson