Pa mande Bondye...

Pa mande Bondye pou l delivre w de enmiw, paske toutotan ou nan vi sa a, wap gen enmi. Epi bon moun pa vle di yo pa ka rayiw. Dayè, bib la klè sou sa, nan dènye jou yo, moun pap renmen moun kap fè byen, ya pito plezi pase Bondye (2 Timote 3.1-5). Si w pa vle gen enmi, se kòmsi w te mande Bondye retire w nan mond sa.

Sitou si ou se kretyen, ou pa bezwen fè mal pou w gen enmi. An lagan, depi jou ou deside sèvi Bondye a ou enmi satan ak tout akolit li yo. Nan kay wap viv la, trè souvan, menm frè ak sè kont ou san w pa fè anyen ki mal. Jezi te di sa wi, kretyen yo ap gen pou enmi pwop fanmi yo (Matye 10.36).

Yon moun ka enmiw pou plizyè rezon: pansew, aksyon w ki diferan de li, benediksyon w, repitasyon w, pasyans ou, bonte ou, pridans ou, seryozite w...

Depi w anpeche yon moun fè sa l renmen, enmi! Ou di yon verite ki blese l, enmi. Ou blame l pou sa l k fè ki pa bon, enmi. Ou pa vle prete l kòb, enmi! Wap mache sou 13 ou pou w pa pile 14 li, enmi. Menm anndan legliz, kretyen ki nan menm gwoup avèw make w enmi jis pakse w pa pataje menm lide avè l oubyen w konn preche oswa chante pase l.

Ou wè si Bondye ta gen pou l delivre w de enmi w, se pa 1,2,3 moun ki tap mouri. Alò, mwen ankouraje w mande Bondye fòs pou w viv ak enmi w. Mande l pou l aprann ou renmen enmi w, se sa li te di nan Matye 5.43-48.

Ki benediksyon ki genyen lè w renmen sèlman moun ki renmen w? Moun kap mechanste renmen moun kap fè mechanste. Vagabon renmen vagabon parèy li, egri renmen egri parèy li. Bon, ki diferans ki tap genyen si se moun ki renmen w ou renmen?
Vrè renmen an se lè w ka sipòte yon moun ki fèw mal, lè w priye pou moun kap pèsekite w, lè w pa kenbe moun ki kont ou nan kè w, lè w pa rann mal pou mal. Lè w pa chache okenn rezon pou w jistifye yon pwoblèm ki pa egziste.

Yon enmi ka plis fè w fè efò e siveye kote wap met pye w. Yon enmi ka fè w fè siksè paske wap konnen gen moun ki kont ou ki pap pran nenpòt bagay nan menw. Wa konnen pouw manyè ret lakay ou depi l fè nwa. Konsa, lè zen pete, lapolis pase, boutèy voye, zam tire, yo pa p site non w. Wa sispann chita ak zanmi pouw ap kale do sila ki pi bon pase w. Wa sispann pale nan zafè moun pou vye regleman pa fèw dezagreman.

M fini wi. Men pa di m pat di w sa.

JDE
M'ap viv, map swiv!

Ou pa bezwen bay tet ou...

Ou pa bezwen bay tèt ou pwoblèm zanmi'm. Moun ki konnen konnen deja kilès ou ye. Ou ka fè tout sa k posib pouw montre w pa moun ou ye a, men alafen, lanati ap devwale w kanmenm si w pa deside chanje fizi w zepòl.

Se paske w se sa ki fè w gen pwoblèm lè yo pale w de sa. Se paske w konn sa ki fè fache lè yo di w sa. Sa pou w fè a, ou byen konnen l, C H A N J E. 6 grenn timo ki ka fèw vin yon lòt moun nan sosyete a, nan fanmi w, nan legliz la, nan mache a, nan travay la.

Wap chache bay moun pote chay ou pandanke w konnen se ou ki antò. Wap rele pasi pala, fè priye pou ou, ba w vèy de nwi, jene epi w konnen byen se ou ki te pèdi wòl ou. Ou byen konnen pwoblèm kote l chita, epi w ap fè moun fè kòve.

Pa chache defann ou paske santans ou ka agrave, soufrans ou ka pi long. Si sa yo di w fè a ou pa fè l, ret an silans, se lè sa a Exode 14.14 la ap aplike nan lavi w.

Bondye pa konn defann koupab ki pa rekonèt erè li. David te rekonèt peche li, pwofèt Natan te di l: ou pap mouri. Men David pat epanye anba tout konsekans yo. Pitit Batcheba a te mouri, Wayom nan te divize, Amnon kouche ak demi sè li Tama. Tout sa se konsekans peche.

Pa gen anyen kap pase nan viw ki se aza.
Swa satan ap tante w
Swa wap peye yon konsekans
Swa Bondye ap epwouve w.

M fini wi.

JDE
M'ap viv, m'ap swiv.

Bib ka pat janm di nou...

Bib la pat janm di nou demen ap pi bèl nan mond sa a. Li pat janm di kretyen yo tap viv alèz nan yon mond kote se moun kap fè mal ki pi popilè. Se sa ki fè, pandan wap kritike moun kap fè mal, ou bezen veye kòw pou w pa tonbe nan menm penpenp la.

Defwa, wap kritike moun kap fè abi epi se sa wap fè tou. Li vin pi fasil pou moun wè sa lòt ap fè ke sa lap fè. Jezi te di retire boit bwa ki nan jew la, konsa wa konnen koman pouw ede lòt la retire pal la.

Sa di, pandan wap denonse, wap devwale, wap di verite, fòw pa bliye bout bwa ki nan jew la. Se sa nou chak dwe fè chak fwa nou santi nou ta pale yon lòt mal. Sa ap ede mwen menm avè w korije tèt nou poun ka vin yon modèl pou sila yo ki pèdi nan inyorans ak imoralite.

Nou pap janm fin bon a 100% men nou dwe fè efò tout tan pou n ka amelore fason nap viv nan sosyete a, nan legliz la, nan travay la, nan lekòl la... Ann pa pran woulib sou pawòl ki di:"Lòm ka fè erè " pou n ap kontinye mache kochi nan vi kretyèn nou. Gen bagay pou n kite rapid, gen lòt nap kite detanzantan, e gen lòt kap soti sèlman si nou gen volonte e pran konsyans.

Ou pa ka kretyen epi se tren mond sa a ki modèl ou, bousòl ou, mobil ou. Kretyen yo aple pou yo mache nan limyè a ki se Verite a, (Efezyen 5.8-9). Si w santi lemond ap rale w toujou, se paske w poko fin soude nan levanjil. Si wap flote jis ou rive tounen nan labou peche ankò, se paske w pat sou levanjil vre.

Resezi w.
Repanse lavi w nan levanjil.

Jan David te di l la:" Gade wè si m sou yon move chemen. Mennen m sou chemen ki la pou tout tan an."(Som 139.24)

Moyiz bò pa li, te di:"Moutre nou pou nou pa bliye jan lavi nou kout, pou nou kapab chache konprann tout bagay".(Som 90.12)

Si w nan konfizyon, Bondye pa responsab.

JDE
Map viv, map swiv.

Je ne suis pas, mais

Je ne suis pas un journaliste mais sans moi et tous les problèmes qui me concernent, il n'y aura pas de nouvelles.

Je ne suis pas un médecin mais si je ne tombe pas malade les médecins ne pourront pas travailler.

Je ne suis pas un candidat mais sans mon vote, il n'y aura pas d'élection.

Je ne suis pas un politicien mais toutes les promesses des politiciens se reposent sur moi.

Je ne suis pas un musicien ni un chanteur mais c'est moi qui dois acheter un album pour écouter les musiques d'un artiste.

Que sais-je du montage des projets? Rien, mais le budget me concerne.

Je ne suis pas un homme riche, mais ma pauvreté enrichit les hommes d'affaires.

Je ne suis pas Jésus, le sauveur du monde, mais il a été crucifié pour me sauver.

Je ne suis pas Dieu, mais il m'a créé pour l'adorer.

Tu peux dire tout ce que tu veux pour me rabaisser, je serai toujours important, même lorsque je meurs car sans moi, les morgues n'ont pas leur raison d'être et les cimetières n'existeraient pas.

Jérôme Dorsonne Emerson
03 juin 2016

Pwoblem nou nan men nou...

Pwoblèm nou nan men nou, solisyon nou nan men nou. Si nap soufri, se nou ki lakoz. Sin pa ko delivre, nou ki pa vle.

Le w ka pale ou pa pale, yon bèbè pi enpòtan pasew. Lè w ka gade pou w wè epi w fè kòmsi w pa wè, yon avèg pi enpòtan pase w.

Pwoblèm nou nan men nou, solisyon nou nan men nou.

Yon pwoblèm ki pa gen solisyon, se yon pwoblèm ki pa byen poze. Depi l byen poze, li pa ka pa gen solisyon. Kòman n poze pwoblèm lakay?

Nou tout panse nou gen solisyon an. Men se vre, nou tout gen solisyon an men konbyen fwa ou wè plizyè elèv sou yon sèl tablo ak yon sèl baton krè ap rezoud yon pwoblèm? Jamè!

Pwoblèm nou nan men nou, solisyon nou nan men nou.

Gen moun ki pito pwoblèm, paske se nan fè pase tan li jwenn solisyon pou pwoblèm pal. Gen lòt moun ki gen solisyon an men sil rezoud pwoblèm nan, pwoblèm pa l pap ka rezoud.

Si w deside rezoud yon pwoblèm, wap jwenn ak sila ki kont rezoud li a. Si w ta vle ede sila ki bezwen pwoblèm nan rezoud la, l'ap panse se solisyon an ou bezwen pwofite. Poutet sa, li sere fòmil ki pi enpòtan an.

Pwoblèm nou nan men nou, solisyon nou nan men nou.

JDE
Map viv, map swiv

Lontan, nou te bezwen achte yon...

Lontan, nou te bezwen achete yon revèy oubyen yon mont pou n gade lè, telefon nan di sa fini.

Lontan, nou te bezwen gen yon flach pou n achte pil mete, yon radyo pou n tande mizik ak nouvèl, telefon di sa se bagay pase.

Lontan, nou te bezwen achte yon bib, yon chan Desperans ak yon diksyonè, a! Telefòn di mwen gen tout sa disponib.

Nan tan lontan, nou te bezwen yon ti kanè ak yon plim oubyen yon kreyon pou n ekri nimewo telefòn oubyen yon ti nòt, bòs telefòn antre sa.

Pa twò lontan, pou n te navige sou entènèt, nou te bezwen 25 goud pou 30 minit. Ak telefòn koulye a se 9 goud pou 24è.

M sonje lontan, se pa ti mizè w konn pase pou w jwenn nimewo telefòn moun ki nan peyi letranje pou pale ak yo. O O, telefòn nan retire sa. Depi w sou gwoup whatsapp, yap jwenn ou.

M manke bliye lontan pou lè nèg te bezwen fè bèl pòz foto, ou te antre nan yon estidyo. Koze maryaj, kominyon, gradyasyon, antèman elatriye, se kameraman ki te konn fè sa. Ak telefòn, tout moun se kameraman ak videograf.

Lontan wi, m! Fow te branche radyo oubyen li jounal oubyen wale sou Google sou laptop pou w chache enfo. Eeey, koulye a tèlman gen jounafòn, pafwa ou pa konn ki enfomasyon ki vrè ki sa ki fo.

Bon, m raple m lontan, moun te konn respekte moun anpil, sitou moun ou pa konnen. Koulye a ak telefòn, depi yon paj nouvèl pataje yon atik, yo pa menm bezwen li atik la pou yo sal non moun sa.

Awi, sa fè lontan, pou w te gen kominikasyon ak yon moun ki jis Lachin epi preche l levanjil, fow ta gen anpil kòb, ebyen telefòn pèmèt kretyen monte sou rezo sosyal yo pou fè tout moun konnen Jezi ap retounen.

Pa bliye teknoloji jwe yon gwo wòl nan sa ki gen pou rive nan dènye moman yo. Sa a se twòkèt la, chay la dèyè. Pa di w pat konnen.

JDE
Map viv, map swiv

Depiw nan yo di,,,

Yo di

Depi w nan yo di, li fasil pou w nan bay manti e menm defann ledyab. Banm bow kek siyifikasyon de "yo di".

Wap sipòte rapòtè

Yo di a kòmanse apati de yon moun ki vin diw "yo di". Se depi la a pou w tou retire l. Fè moun sa a diw egzakteman kilès ki di a. Si li pa kapab, pa tande l oubyen kite sal di a la, pa ale lwen avèl paske li menm li pa gen yon prèv, kòman w pral fè gen youn? Si w ta renmen konnen sa l di a se verite, mande lòt moun jiskaske w jwenn yon prèv. Se pa paske tout moun ap di yon bagay pou w panse l se verite. Move nouvèl ak manti se bagay ki pataje rapid nan yon tibout jounen, sitou ak koze rezo sosyal sa yo. Lè wap di sa moun ap di san yo pa konnen ou patisipe nan voye monte a tou.

Ou pa gen agiman

Yo di se youn nan prèv ke w pa gen agiman pouw pwouve sa wap di a. Moun kap tande w la bezwen konnen, konprann, kwè e aji selon sa wap di a. Ou dwe gen agiman pouw montre l otantisite sa w ap pataje avel la. Sinon, sa montre menm ou menm ou pa fin sèten de sa.

Ou pa konn reflechi

Lè yon moun di w yo di, epi w ap di l tou, sa pwouve ke w pa konn reflechi. Gen de bagay moun di ou ka kwè rapid men gen lòt bagay, se refleksyon ki pou w fèw kwè. E fow pa reflechi yon fason timoun pouw pa montre febles ou.
Anpil fwa tou, gen moun ki itilize "yo di" pou kreye pwòp enfòmasyon pa yo paske yo konnen "yo" pa yon moun. Ou pap janm konnen l. Depi se sou "yo" yon moun lage sa li tande, panse e kwè de ou, ou nan pwoblèm.

Gen moun ki rayi moun nan yo di. Gen moun ki tiye moun nan yo di. Gen mari ki divòse nan yo di. Gen gwo divizyon ki fèt nan yo di. Gen dout moun genyen jis li al anba tè nan yo di.

Ou pa ka yon lidè, yon pèsonaj piblik, yon politisyen, yon pwofesyonèl, yon kretyen serye, yon jounalis pouw ap jije, sanksyone e menm kondane moun sou sa yo di.

Chache konnen avan, paske gen moun se konsa sèlman yo ka konbat yon moun yo rayi, yo ta vle echwe. Li gentan konnen depi l lage yon fo enfomasyon, gen moun ki pral fè l mache pou li. Antouka, si anpil moun ap fè sa, se pa yon rezon pou w fè l tou.

Bouch ou reprezante w kote w pase. Non ou se mak pesonalite w. Le anpil moun konnen w, pawòl ou gen anpil enpòtans. Menm blag ou fè tout moun ri. Se konsa tou tout saw di, yo ka kwè l. Men si yo dekouvri w nan rapòte sa yo di san prèv, ou pèdi konfyans yo te met nan ou a.

Nan sans sa a, ou menm ki konprann sa pa ka kontinye ap fè pase sa yo di sanw pa reflechi epi chache konnen.

JDE