Padone fè pati konba a

Meyè fason pou w soulaje nan doulè mal la fè w la, se padone moun ki te fè l la. Kenbe l nan kè w ogmante soufrans yo chak jou. Chak fwa w panse ak pawòl sa a, kou sa a, desepsyon sa a, trayizon sa a, se soufrans ou k ap vin pi plis. 

Ou ka bezwen inyore l, evite l, fè kòmsi rankin ou ap rezoud li, men se pa vre. Sitou, lè ou se kretyen, ou ta dwe toujou evite gen pwoblèm ak moun, paske ofinal, menmsi w ta bat lestomak ou di w p ap janm padone l, ou mache fè moun pou li, ou menm tounen nan pase l pou w ka regle ak li, w ap nan obligasyon yon jou pou w padone l paske se sa Bondye te fè pou ou lè li te chwazi aksepte w malgre tout peche w yo. 

Sa pa vle di w fèb lè w padone. Okontrè, ou ase entèlijan pou w konprann rankin, vanjans p ap itil ou anyen. Ou ase fò pou w konprann mwayen ki pi fasil pou w evite plis doulè, plis chagren, plis lapèn, se kouri dèyè tout vye lide k ap fè w panse tankou mechan an. Ala kontan w ta kontan si yon malè ta rive moun ki te fè w mal la! Ala fèt ou ta fè si l ta nan yon zen, yon pèt, nan mawon! Wi, ou t ap soulaje men di tèt ou, ala kontan dyab la ta kontan si Bondye ta kondane w pou valè peche w fè anba tab, nan fè nwa! Bondye t ap jis, pa vre? Menm jan ak ou menm ki jis nan bezwen pou malè rive enmi w lan. 

Pa panse m ase timoun pou m konprann li fasil pou w padone mal yo te fè w la. Dayè, m te nan menm sitiyasyon sa plizyè fwa men se chak jou m ap mande Bondye ban m fòs pou m padone. Se pa mwen ak ou sèlman ki nan ka sa a, moun ou pa ta panse gen rankin anvayi kè yo. Ou p ap konn sa si w pa nan yon sitiyasyon, yon malè, pou w tande bri k ap fèt, fèt k ap fèt, chanpay, byè, wiski k ap koule, jis paske ou nan yon pwoblèm ki fè enmi w yo rejwi. 

Si w panse w ka goumen kont tout lespri mechan k ap fè kanaval nan lemonn, m dezole jodi a pou m di w ou echwe menm avan w kòmanse. Se sèl renmen ki ka fè w pote viktwa kont vyolans espirityèl ki kache dèyè anpil souri, bèl pawòl, bèl rad e bèl kanpay. 

Si padon te fasil, Covid-19 pa t ap fè tout dega sa yo. Mwen menm ak ou pa t ap lwen konsa. Nou pa t ap dozado konsa. Se paske listwa ki mal tounen antre nou yo kite yon rankin ki pi fò pase talan nou, diplòm nou, doktora nou, konsyans nou, richès nou, relasyon nou. Sèvo nou ase pwisan pou l kenbe anpil konesans men kè nou pa gen menm yon kilobayt espas pou sipòte moun ki fè nou mal. E se ti espas sa a ki fè anpil nan nou pa kwè Bondye egziste. Nou bay rankin plis plas, plis pouvwa, plis otorite ki fè malgre nou ansanm, lespri nou divize. 

Meyè fason pou w soulaje nan doulè mal la fè w la, se padone moun ki te fè l la. Kenbe l nan kè w ogmante soufrans yo chak jou. Chak fwa w panse ak pawòl sa a, kou sa a, desepsyon sa a, trayizon sa a, se soufrans ou k ap vin pi plis. 

JDE

Reyaksyon moun w ap dirije yo se rezilta lidèchip ou

Si legliz la te chak moun ki lakay yo san yo pa t bezwen ale nan yon kay, 200 kretyen pa t ap bezwen yon lidè. Paske, lidèchip la enpòtan kote ki gen moun san direksyon. Sa vle di, si w se yon lidè oswa ou nan plas yon lidè, direksyon fidèl yo pran an, se ou ki bay li. Si se pa sa, ou pa t janm lidè yo. Pwen final. 

Gen plizyè definisyon pou lidè. Pami yo, n ap konsidere sa a: chèf yon gwoup ki konn kòman pou l fè moun ki nan gwoup sa a swiv li. Si w ap byen etidye lidèchip Jezi, w ap remake pawòl sa yo souvan: swiv mwen, kwè nan mwen, vini, ale... Tout disip li yo te toujou obeyi l. 

Si nan yon kay, papa a oswa manman an pa ka fè pitit li obeyi l, apot Pòl, nan 1 Timote 3.4, diskalifye yon moun konsa ki ta bezwen vin chèf nan legliz la. Li pa di l pa kretyen ni la pa sove men li pa ka dirije nan legliz Kris la. Anefè, pou w vin chèf oswa lidè, toujou nan tèks sa a, apot la drese yon lis egzijans: 

1. Ou dwe san repwòch 

2. Ou dwe gen 1 sèl madanm 

3. Ou dwe yon moun serye 

4. Ou dwe konn resevwa moun lakay ou 

5. Ou dwe ka montre verite a

6. Ou pa dwe renmen bwè 

7. Ou pa dwe renmen fè zen 

8. Ou dwe gen pasyans ak kè poze

9. Ou pa dwe renmen lajan 

10. Ou dwe gen otorite lakay ou 

Jodi a, si anpil moun ki te legliz gaye, lavi y ap mennen an pa bon, nou pa dwe kouri jije yo koupab san nou pa gade responsablite nou avan. Eske nan lis 10 egzijans sa yo, ou menm ki lidè (dyak, pastè, predikatè, prezidan lajenès, prezidan dam), ou wè yo lakay ou? 

M pa ekri tèks sa a pou m jije w, ni voye monte sou ou men se pou fè w reflechi sou enpak konpòtman w, konesans ou, sajès ou nan plas ou ye a. Paske, trè souvan, nou plis wè fason fidèl yo ap mal viv, men nou pa wè si se fason n ap viv ki lakoz sa. Nou plis pale lavi kache yo san nou pa wè pa nou an. Sa pa ka kontinye konsa. Nou se lidè, reyaksyon moun n ap dirije yo se rezilta travay nou, misyon nou. 

Mwen pa kwè yo janm jije kapasite yon moun sou eskiz li, inyorans li, neglijans li ak parès li. Sa vle di, si w ap byen travay kote w ye a, se rezilta a k ap fè yo jije w. Elèv yo pa ka kreten epi pou w fò. Fidèl nan legliz yo pa Gaye agoch adwat epi w pou w bat lestomak ou di w se yon lidè, yon rasanblè. Pa gen koyerans ditou. 

Jan m toujou di l, yon paran pa ka ap di pitit li pa respekte l. Se yon desepsyon total kapital. Kòman fè pou pitit ou pa respekte w la? Se absans ou, lese ale w, mank otorite w ki lakoz sa. Kifè, irespè pitit ou genyen an se rezilta iresponsablite w. Sinon, ou pa paran, admèt sa epi fè silans. 

Lè yon elèv pa ka aprann, ou pa di l sòt. Se ou ki pa konnen pou w chanje metòd, paske chak moun gen yon Q (quotient) ki fò lakay li. Pa ka kenbe leson pa fè yon elèv kreten ni pa ka rezoud yon pwoblèm matematik pa fè l tou. Se konpetans ou ki se rezilta etid ak eksperyans ou k ap fè w konnen ki metòd pou w itilize nan tèl sitiyasyon. 

Sa fè lontan, n ap fè moun reyini legliz pou swiv leson dominikal, lapriyè, chante, tande prèch epi n a rewè dimanch. Nou dwe fè yon ti pase men nan sa e Covid-19 la montre nou nesesite a. Nou pa ta ka atann jan nou t ap adminsitre legliz la ta pral fè kretyen sou lapriyè lè pòt kay la (se pa legliz la) fèmen. Yo pa t janm gen abitid, majorite, fè sèvis lakay yo (legliz lafami). Okontrè,  gen anpil moun ki pote move non nan òganize priyè ak etid lakay yo. Yo toujou di y ap fè legliz. Ebyen, apa jodi a, se konsa l ye. Ou wè si n te kite l mache konsa pa t ap gen pwoblèm.

M pa ekri tèks sa a pou tag pèsonn men pou voye yon mesaj bay tout lidè nan legliz Kris la pou yo tou pwofite Covid-19 la pou yo chanje metòd yo. Se senp, nou pa bezwen nan fè deba ak kòlè, reyalite a montre lidèchip nou yo dwe chanje. Chanjman sa a pa ka yon pwoblèm paske li nesesè e konsekans yo evidan. 

Pou m fini, lè mwen t ap dirije legliz, mwen te kite pawòl la dirije aksyon m yo, inisyativ mwen yo. M pa di m te san kritik men omwen m te ka twonpe nan pran inisyativ men pa nan rete de(2) bra kwaze, kritike, sanksyone, voye monte. M te toujou vle wè devwa m, responsabilite m nan tout deriv. Si 2 jèn ap joure pandan m la, sa vle di prezans mwen pa enpakte yo. Di yo frekan pi fasil men reflechi sou kòman m ka evite sa difisil e se li ki dwe fèt la. 

Nan plas rete lakou ou, nan biwo w antanke lidè pou w ap di fidèl yo pa vin legliz pa serye. Yo gen kay tou, e yo bezwen pou w pase wè yo pou w konstate ak de grenn je w kòman y ap viv. Li pi fasil pou w kwè sa yo vin di w pase w chache konnen si se vre. Atitid sa a detwi relasyon pastè-fidèl la e ankouraje chit. 

Nou p ap dirije pou n detwi mouton yo. Yo sou kont nou. Se nou ki lidè yo se pa yo ki lidè nou. Se nou ki dwe egzanp pou yo, se pa envès la. Nan non Jezi Sovè nou, mwen mande pou n repanse lidèchip nou. Se pou n jene pou n wè si lidèchip nou pa responsab avan nou bay reyaksyon fidèl yo responsab. 

Kòmantè: https://m.facebook.com/story.php?story_fbid=336186644034635&id=100029299054022

JDE

16 jen 2020

Kat (4) rezon ki fè w kwè nan lavi aprè lanmò

Gen pawòl ou di pou montre w pa kwè e se pawòl sa ki montre ou tèlman kwè ou pa ka wè pwofondè kwayans ou. M pral itilize tèks sa m ekri plizyè fwa pou m montre w byen kwè nan lavi aprè lanmò k ap louvri sou de lòt vi etènèl: youn nan wayòm Bondye a, lòt la nan dife a.

Devlopman

1. Li devan ou dèyè

Si lè yon pwòch ou mouri, ou di li devan ou dèyè, sa vle di gen yon kote li prale. Ki kote sa menm? Si aprè lanmò pa gen anyen, pa gen pyès kote moun ki mouri yo prale pou n ta di yo n ap swiv yo. Se paske w kwè gen yon kote ki fè w ka di sa.

2. Bondye resevwa l lakay ou

Poukisa w oblije mande Bondye resevwa yon moun ki mouri lakay li di aprè lanmò pa gen anyen? Kay Bondye a ta dwe paradi a, pa vre? E si gen kay Bondye, se paske w sipoze gen yon lòt kay ki pa lòt ke kay Satan. Kidonk, nan lanfè! Sa montre tou, tout tan w t ap di w pa kwè nan vi aprè lanmò a, ou te sou blòf. Ou byen kwè!

3. Ou pè zonbi

Bon, kòman yon moun ki fin mouri ka tounen vivan sou yon lòt fòm si lanmò se finisman tout bagay? M pa konprann. Lanmò ta dwe tou fini ak moun sa a, sof si se ta yon lespri ki antre nan li ki parèt pou li. Nan ka sa a, zonbi se t ap yon manèv lòm fè pou fè lòm parèy li kwè. Si w pè zonbi, sa vle di w kwè aprè lanmò tout bagay pa fini.

4. Ou konn rele zonbi

Poukisa si depi m mouri, tout bagay fini epi w al rele m pou w fè m pale? M toujou di mwen m t ap fè moun sa a revini. M pa di li pa egziste non, m poko wè e Bib la pale de sa. Men, kòman yon moun fè mouri epi pou l vin pale si aprè lanmò pa gen anyen? M nan gwo konfizyon.

Konklizyon

Se Bondye ki fè w ka kwè e pa kwè. Se pa ou. Li kreye w lib, e se sa k fè w pa vle esklav pèsonn. Toutfwa, libète w pa vle di w se yon Bondye tou. Ou ka mouri. Ou ka lite kont esklavaj men se pa kont mòtalite. Aprè lanmò, tout bagay pa fini. Gen yon lòt vi k ap tann ou, ke ou kwè ke w pa kwè.

Apèl

Vin jwenn Kris jodi a zanmi m pou w ka gen lavi ki p ap janm fini an. Kowona ap pase men Kris ap rete. Ou gen yon syèl pou w genyen e yon lanfè pou w epanye. Pa fè tèt di. Pa di w ap gen tan. Se jodi a menm pou w remèt Kris lavi w.

Direksyon

Ou pa bezwen yon legliz ni yon frè pou konvèti w. Kote w ye a, jan w ye a, pale ak Mèt linivè a pou w repanti e chanje direksyon nan wout ou ye a. Se pou Lespri Bondye a antre nan ou kote w ye a pou l kontinye bèl travay sa a nan ou. Amèn!

JDE
Kòmantè: https://m.facebook.com/story.php?story_fbid=336841747302458&id=100029299054022

Èske fèt nan yon fanmi kretyen asire sali mwen?

Sijè (4)

Èske fèt nan yon fanmi kretyen asire sali mwen? 

ENTWODIKSYON 

Ou poko tande timoun, jèn oswa granmoun k ap di w yo leve nan yon fanmi kretyen? Gen ki konn di yo fèt nan levanjil oswa legliz. Kòmkwa, sa se yon prèv yo sove oswa yo gen plis privilèj pase timoun ki fèt nan plasay oswa nan vyòl. Èske se vre? Èske w te fèt nan yon fanmi kretyen? Èske sa vle di w tou sove gras ak lapriyè paran w? 

Pou n reponn kesyon sa yo, nou pral develope pwen sa yo: 

1. Definisyon yon fanmi kretyen

2. Sans fèt nan fanmi kretyen oswa nan levanjil genyen

3. Kèk karakteristik sove 

4. Konklizyon 

Annou wè!

DEVLOPMAN 

1. Definisyon yon fanmi kretyen

Daprè yon atik ki pibliye sou Gotquestion.org (https://www.gotquestions.org/Francais/famille-chretienne.html), premye karakteristik yon fanmi kretyen se lè tout manm ki ladan (manman, papa ak pitit) se kretyen e yo gen yon veritab relasyon ak Kris ki se Sovè e Mèt yo. Depi la, nou ka tou wè pa gen fanmi kretyen san maryaj. Pou fini, si w fèt oswa ap viv nan yon fanmi kretyen, gen de (2) siy k ap montre sa: ou obeyi paran w e ou onore yo. Ou pa bezwen plis agiman pou w konnen si w ap viv oswa te fèt ladan. Pou plis detay, klike sou lyen an.

2. Sans fèt nan fanmi kretyen oswa nan levanjil genyen

Daprè lide maryaj la ki karakterize yon fanmi kretyen, ou fèt ladan si se te nan maryaj. Gwosès avan maryaj la diskitab, men anjeneral, si manman w ak papa w te kretyen, ou fèt nan yon fanmi kretyen. Toutfwa, ou pa kretyen pou sa. Ou se pitit kretyen menm jan kreyati Bondye pa vle di pitit Bondye. 

ATANSYON!!! 

1. Se yon erè lè w di w fèt nan levanjil. Menm Jezi pa t fèt nan levanjil, alewè apot yo. Jezi se levanjil la menm. 

2. Ou fèt nan legliz si manman w akouche w nan kay kote asanble a, men legliz pa matènite ni lopital. Pèsonn pa ka fèt ladan. 

3. Kèk karakteristik sove 

Sove se youn pami sijè ki kreye plis diskisyon nan legliz oswa nan deba sitou nan koze SSN nan (SOVE SOVE NÈT). Sepandan, parapò ak lafwa ou bezwen pou w sove, manman w ak papa w pa ka sove w paske sove pa yon eritaj fanmi, se gras Bondye nan Jezikri sèlman. Li pasaj sa yo pou plis detay : Jan 1.11-13, 3.16, Efezyen 2.8-9, Tit 3.15. Men kèk karakteristik sove: diven (li soti nan Bondye e depann de li), gratis (ou pa peye pou sa), etènèl (ou sove nèt), pratik (lavi w ap montre sa), envizib (se pa je ki wè sa), pèsonèl (se ou ki pou chwazi sove). 

4. Konklizyon 

Pou n fini, n ap reponn twa (3) kesyon nou te poze nan ENTWODIKSYON an sou lobedyans sijè a: 

Èske fèt nan yon fanmi kretyen asire sali mwen? 

1. Èske se vre? 

Non. Se pa vre, paske sove pa familyal. Kidonk, nan okenn ka, papa w ak manman w te mèt adwat Jezi, yo pa ka sove w. Konpòtman yo, jan yo trete w, egzanp yo ye pou ou, fason yo te edike w daprè Pwovèb 22.6 la ka enfliyanse w, sa Alfred Kuen rele "preevanjelizasyon" men lapriyè yo oswa fidelite yo pa ka ba w lavi ki p ap janm fini an. Si w gen dout, etidye Jan 1.11-13. 

2. Èske w te fèt nan yon fanmi kretyen? 

Ou gen tout agiman posib pou w reponn koulye a.

3. Èske sa vle di w tou sove gras ak lapriyè paran w? 

Non. Si w te kwè sa, chanje lide rapid. Fidelite paran w pa kouvèti pou w viv nan peche, nan libètinay epi kou twonpèt la sonnen w ap monte. Koze sove a t ap yon veritab konfyolo ant paran w ak Bondye. Leve de men w anlè pou w bay Bondye glwa paske li pa t konsa, li pa konsa e l p ap janm konsa. Amèn!

APÈL!

Ou menm ki se pitit yon manman oswa yon papa kretyen, Jezikri ap rele w. Pa konte sou lapriyè yo paske yo pa ka sove w. Ou ka jwi anpil privilèj, tankou bous etid, anplwa, aksè nan tout byen legliz la gras ak papa w. Se nòmal, afè papa w se afè pa w men zafè sove a se zafè Kris la. Repanti. 

JDE

Pou plis mesaj, renmen paj JDE a http://www.facebook.com/101330594943964?referrer=whatsapp

EKSPERYANS PÈSONÈL MWEN AK REZO SOSYAL

BAN MWEN RAKONTE NOU EKSPERYANS PÈSONÈL MWEN AK REZO SOSYAL

Mwen panse ke eksperyans mwen ak rezo sosyal yo ka sèvi nou gwo leson pou nenpòt nouvo pwojè nou va gen pou nou antreprann.

Ann ale vit💨
Nou an septanm 2018, lè sa mwen sou pik mwen sou facebook, 41 mil abòne, mwen fè 11 mil nouvo abòne nan yon mwa. Chak piblikasyon m se 2K, 3K like, reyaksyon yo toujou pozitiv.  Se te kèk mwa aprè mondyal 2018 la, mwen relanse feyton "barikad la", youn nan pi bèl tèks mwen ekri, anpil felisitasyon ak demand ami, map byen pase sou rezo sosyal.

Moun toujou ap apwoche m pou di m fòk mwen ekplwate rezo sosyal yo paske mwen gen yon bèl odyans. Genyen ki di si yo te nan plas mwen yo te pase. Jeneralman mwen tande konsèy yo, lè moun lan pi pwòch mwen mwen esplike l gran anbisyon m, men rezon ki fè mwen poko lanse kèk pwojè.

LESON #1 : Menm moun ki swete reyisit ou yo plis wè opòtinite pase obstak yo, echèk ou pap gen eskiz, se mete grenn pou fè sa w dwe fè a.

«Pasyans se pa chita rete tann, men se aji pandan wap tann.» Se pi gwo pawòl mwen mizik mwen tande nan vi m.
Mwen deside lanse yon pwojè ki gen rapò ak prezans mwen sou facebook, mwen fè yon piblikasyon, mwen di : «KIYÈS KI TA RENMEN JHERRY SÒTI YON LIV? »
Mezanmiiii, reyaksyon yo dechennen!!! Moun yo pran kesyon m lan pou yon nouvèl tèlman yo montre m yo tap tann sa.
KÈK NAN KÒMANTÈ YO :👇
- Moi, moi, moi
- dat pou w te fè sa brother
- map tann li
- mwen te ba w konsèy la deja wi Jherry

Depi piti se te toujou foli m (sòti yon liv).  Mwen tap bezwen 10 piblikasyon pou m esplike nou peri pesi mwen pase pou m sòti liv sa. Sitou se te premye eksperyans mwen gen yon pakèt detay teknik mwen pa metrize. Sitou mwen pa yon ekriven tankou tout lòt. Mwen pa gen yon liy, yon kanal, yon anviwonnman literè. Mwen sèlman ekri anpil epi byen nan yon lang fasil. Yo rele m ekriven mwen asime l, men mwen pa nan sèk la. Dayè mwen pa menm pran fòmasyon pou sa. Mwen gen tout kalite zanmi, sof ekriven, sa fè li te difisil pou m jwenn bon enfòmasyon pou m antame pwojè m lan.

LESON MORAL #2 : pou kont ou wap ale vit, men ak moun ou prale pi byen. Antoure w ak moun ki gen menm rèv avèk ou, konsa youn ap pwofesè oubyen elèv lòt.

Tan pase vit, nou gentan desanm 2018, objektif mwen bay tèt mwen se fen janvye 2019 fòk liv la sòti.

Tout pandan map travay, map enfòme, map fè maketin rèd, rèd. Mwen pase 2 semèn, chak maten mwen pibliye «Sonje sere 5 goud chak jou pou w ka achte liv Jherry a.» Moun yo toujou la pou ankouraje m.
- Map tann li genie
- Map vini Jhé
- Ou nap tann nèg sèvo a

Mwen toujou ap fè tès, toujou ap raple moun, men konsantrasyon m sou liv la fè m neglije poste sou facebook, sa fè odyans lan vin manke aktif, lè m fè post mwen pa jwenn menm kantite reyaksyon yo, men mwen gentan konnen ki taktik mwen pral itilize lè liv la prèske prè pou m ka aktive yo ankò epi fè piblisite.

TAN AN RE BWÈ M ANKÒ, MEN MWEN FÈ PWOGRÈ
Mwen fikse dat vant siyati pou samdi 23 fevriye 2019 gonayiv / samdi 2 mas pòtoprens.
Men mwen konsantre sou dat gonayiv la paske mwen te vle fè yon bèl aktivite ki depase kad vant siyati.
Boummmmmmmm💥 André Michel, Boplan, Boulòs ak yon ekip lòt vakabon nan swafizan opozisyon yo lòk peyi a.

Lòk la kraze feeling maketin mwen paske moun yo te gentan fokis, men ann parye mwen pa tap gentan pare. Liv mwen ekri a gen twòp volim, sa vle di twòp tèks. Mwen te oblije remanye li pou li bay yon kantite paj rezonab. Poutan tèks la pa ka modifye. Se yon lòt tèks mwen bay enprime konplètman.

Mwen pare kou a, randevou 23 mas Pòtoprens, ri chavàn, anfas Radio Television Caraïbes.

POU M TE FÈ MAKETIN
Mwen fè 41 post nan yon mwa sou paj ofisyèl mwen ak 91 post sou lòt paj mwen gen aksè avèk yo.
San konte mwen pataje chak piblikasyon nan omwen 30 gwoup paske facebook pot ko limite l.
Mwen voye mesaj bay plis pase 4000 zanmi sou messenger, mwen ekri ak tout sa ki reponn.
Mwen te gen plis pase 1500 moun nan kontak watsap mwen nan epòk la, mwen ekri tout, mwen tchat ak sa ki reponn epi mwen voye yon broadcast ba yo chak maten pou motive sou aktivite a.
Mwen gen yon gwoup watsap ki la pou ede m fè maketin menm ak anpil zanmi kap ede m fè piblisite.
Mwen fè yon spòt odyo, 7 flyers diferan koulè ak diferan fòm.
Mwen fè sa yo rele maketin pòt a pòt la, sa vle di ekri yon 100tèn moun enpòtan, di yo "FÒK OU LA WI"✋
Nan 3 dènye jou yo menm, se sa mwen fè sèlman, bay konpayi kap enprime liv yo presyon pi li ka gentan prè epi mache ekri bon zanmi ak bon fantatik grenn pa grenn.

Tout pandan map fè piblisite, malgre peyi lòk, feedback la depase pozitiv. Lè m di entèl fòk ou la wi ✋ Repons : Oh pa la le combattant.

Jiska prezan se afich piblisite sa ki sou kouvèti paj facebook mwen https://m.facebook.com/JherryHaiti/photos/a.1433967043390412/2063410230446087/?type=3&source=54&ref=bookmarks

Pi gwo pwoblèm mwen se paske mwen pat gen ase lajan pou m enprime liv pou tout moun ka jwenn paske se 300 mwen bay fè. Men mwen di yo vini kanmenm, si liv la fini mwen gentan prepare yon bout pawòl pou sa ki pap jwenn yo.

Lè mwen al pran liv yo se 120 yo remèt mwen, lè m prèske toufe ak kòlè se dlo yo vide sou mwen :
1) misye fè m pèdi yon lavant
2) gade yon wont mwen pral pran ak pil moun sa yo ki pral debake vin sipòte Jherry le combattant

Vant siyiti fèt pandan jounen demen an nòmalman, te kwè mwen vann 16 liv, 3 ladan yo se kredi😀

MWEN KANPE LA✋ MWEN PAP DI ANYEN ANKÒ

TI KOZE AK PIT FI M

Pa konprann kisa renmen ye fè jèn yo pran renmen pou plezi e san kontwòl. Kòm nan tout plezi gen danje, paran yo wè renmen se youn nan relasyon ki ka lakoz pitit yo echwe. Se yon verite, men li t ap pi bon si chak papa, chak manman te pran pitit yo, sitou ti fi yo, pou eksplike yo kisa renmen ye, avantaj ak dezavantaj ki ladan. Malerezman, nan lespri pou pwoteje yo, yo lakoz yo fè move chwa.

Nan anpil istwa mwen ekri, mwen toujou vle fè wè renmen pa yon pwoblèm ni yon peche. Se dwa tout moun ki egziste. An menm tan, mwen souvan montre danje ki gen ladan, sitou lè yon jèn chwazi fè l ankachèt e antre nan relasyon seksyèl avan li marye. An gwo, lè n ap reflechi, nou wè se pa renmen twò bonè a ki pwoblèm vre men se konsekans la parapò ak mank matirite. Se pa fè sèks la ki pwoblèm men se konsekans la, sitou maryaj fòse, gwosès avan lè, parapò ak preparasyon pou pran swen timoun ki fèt la.

Nan yon sosyete tankou Ayiti kote to natalite ak mizè ap ogmante chak peryòd, gwosès prekòs vin youn nan koz majè, paske si pa gen twòp timoun pou ale lekòl, p ap genyen ki pa prale. Konsa, leta, malgre li pa pran responsablite li nèt nan sans sa a, jan li ekri nan Atik 32.1 an, t ap gen plis mwayen pou l pèmèt plis timoun ale lekòl. Malerezman, se menm rezilta pa ale lekòl la ki ogmante pwoblèm pa ka eskolarize timoun k ap fèt nan move kondisyon.

“Ti koze ak pit fi m” se plis yon ti liv, plis yon dyalòg ant yon papa ak pitit fi l, plis sis tèks pou pale de renmen. Se yon vwa k ap pale pou papa yo, yon vwa k ap pale ak pitit fi kou pitit gason yo pou fè yo konnen yo gen dwa renmen, men si yo pa tann lè yo pou fè sa, dwa sa ka trase wout echèk yo.

Nan lòt peyi ki devlope yo, tankou Etazini, renmen pa yon sousi pou paran ni sa pa enkyete leta paske pandan yon jèn fi renmen, li ka ale lekòl, li jwenn inivèsite, li ka travay e leta pran responsablite l kòmsadwa. Sa fè, menm si li ta rive tonbe ansent twò bonè, se pa yon mal paske pitit la ap jwenn tout kalite swen nesesè.
Se diferan nan peyi sou devlope yo, tankou Ayiti, kote gen mwens chans pou yon jèn reyisi lè li paran bonè nan chomaj. Lè nou fè yon ti kout pye nan anpil zòn andeyò, nou remake anpil jèn fi, soti laj 15 pou rive 20 lane, gen pou pi piti yon pitit. Daprè yon atik sou LoppHaiti (20 me 2019), sou chak 100 jèn fi an Ayiti, gen 21 ki dja manman oswa ansent nan laj 19 lane. Nan menm sous sa a, yo endike avan 15 lane, gen sou chak 100 ti fi, gen 13 ki gentan nan fè sèks.

Trè souvan, fè pitit se pi gwo okipasyon jèn manman sa yo, pi gran rezilta yo, pi gwo mizè yo. Y ap leve timoun pou yon sosyete ki pa t prepare yo pou sa. Yo alafwa viktim e responsab. Yo inosan, yo antò men yo se pitit sistèm nan tou.

Devan tout reyalite sa yo ak anpil lòt nou p ap ka site la, se plis yon dwa pou nou itilize tout mwayen posib pou n eseye touche jèn sa yo. Nou p ap ka rezoud pwoblèm yo nèt, mwen konsyan, men nou ka redwi konsekans yo e prepare yon lòt jenerasyon k ap gen pou pran desten Ayiti an men.

Tèks ou pral li yo pa t janm rive nan reyalite. Se pa istwa yon moun espesyalman mwen rakonte ni mwen pa ekri pou m soulve okenn jèn kont paran yo ki se viktim sistèm nan tou. E se sa ki fè y ap viktim tou. Konsa, nan lide pou konsyantize chak jèn fi ak jèn gason, liv sa ekri pou di anpil koze kèk paran p ap oze di pitit yo akoz pwoblèm tan oswa kouraj.

Anpil moun bliye si renmen soti nan Bondye. Kit renmen ou gen pou li, pou lanati, pou paran w ak pou zanmi w soti nan Bondye. E si se pa t renmen, kòman pitit t ap fèt ? Mwen menm ki ekri a ak ou menm k ap li a se rezilta yon relasyon seksyèl. Yon jou, yon aswè, yon kote kèlkonk, yon fanm te rankontre ak yon gason epi yon mwa aprè, fanm nan tonbe ansent. Se li ki manman mwen, se li ki manman w. Pa gen fanmi san manman, papa ak pitit e pa gen sosyete tou san fanmi.

Si nou toujou wè moun, se paske sèks toujou fèt. Jezi te vin mouri pou l sove nou men chak moun l ap sove te fèt gras ak sèks. POUKISA NOU PA KA RENMEN? POUKISA NOU DYABOLIZE SÈKS?

POUKISA NOU PA DI TIMOUN YO VERITE? Y ap grandi, y ap reflechi, y ap konprann e se yo k ap ranplase nou demen. Ki kalite granmoun nou prepare pou yo vin ye demen?

Kwake li adrese ak pitit fi, Ti koze ak pit fi m se pou tout gason, tout paran, tout fòmatè, tout pastè, tout prezidan lajenès nan legliz, tout animatè nan sant kiltirèl.

Mwen pa sispann fè pa m nan, sekle ran pa m nan, fè devwa m daprè kapasite m genyen. Si pa gen rezilta, m pa responsab paske se ansanm pou n rive fè tout sa k ap patisipe nan chanjman an.

San move entansyon!
JDE

Yo wè w byen pwòp

Yo wè w byen pwòp. Dayè, gen bagay yo konnen de ou, an byen ou mal, yo p ap janm di w li. Men y ap tann yon jou kou w eklate pou yo di yo te kwè nan ou. Men si sa rive w desann pi ba, y ap di w yo te gentan konnen w pa ta pral pi lwen.

Pa kite se bravo k ap motive w nan sa w ap fè a. Yon sèl grenn moun k ap sipòte w ka sifi pase 1 milyon paske nan move moman yo, se li k ap la pou l ede w jan li kapab e soutyen li toujou satisfè paske l fè l ak tout kè l. Wi, manje de twa mango ak bon patnè w ka bay plis lajwa pase manje 3 pòm ak yon moun k ap pwofite siksè w.

M di w yo wè w, yo konnen w men gen yon nivo pou w rive avan yo admèt sa w ye a e ba w sa w merite a. Jou sa, raple w m di w sa, se p ap chans, kado ni rezilta tisousou. Se va rezilta travay ou, pasyon w, detèminasyon w, pèseverans ou, konfyans ou, vizyon w. Kenbe tèt ou wo. Se p ap ògèy non, okontrè, se jou sa Bondye fikse pou l leve w pi wo pase otè w pa t janm imajine.

Lè konsa, yo va di w ap pran pòz ou, w ap fè estil, ou bliye kote w soti, ou bliye sa yo te fè pou ou. Yo va di w tout pawòl ki pou rabese w, denigre w, devalorize tout privilèj w ap jwi. Men se yo k ap bliye se pa t pou mouri yo t ap wouze pye bwa. Se te pou l grandi. Yo p ap konprann tout pousad yo t ap ba w yo se te pou fè w monte mach yo.

Sonje! Raple w! Ekri sa! Kenbe sa! Yo wè w byen pwòp. Yo konnen w. Yo konn kapasite w e yo kwè nan ou, se jou a ki poko rive ki fè w panse yo bliye w.

Ret nan liy lan. Kenbe plan an. Pa lage. Ret pozitif. Menmsi w anvi kite sa, pran kouraj. Si w te bay vag, retounen. Pa dekouraje si malgre w ap plante pye bwa depi lontan epi se ebenis ak machann fwi k ap fè kòb sèlman. Pye bwa w yo rale lapli pou peyizan ak lanati, yon jou w ap sezi wè kòman y ap rekonpanse w.

JDE