Annou fè listwa!

Ou abiye jan w vle. Ou kale kò w, ou met rad ou vle e w fè sa w vle ak cheve w, gason ou fanm. 

Poukisa w rele kretyen a  tèt mare paske l chwazi kenbe kò l ak menm libète w genyen an?

Mwen pou yon sosyete kote rasta pa dwe gen pwoblèm nan je yon tèt kale. Chak moun gen dwa pou yo itilize kò yo jan yo vle. Nòmalman, m t ap toujou swete w fè l menm jan ak mwen. Men sa dwe rete nan yon swè, li pa dwe yon obligasyon ni m pa dwe jije w sou sa. 

Pou n konstwi yon sosyete kote dwa tout moun respekte, li enpòtan pou n divòse ak tout eskiz e rapèl k ap fè n regrese. 

M pa gen pwoblèm ak ou si w pa vle aksepte Jezi men pinga w wè m mal paske m ap sèvi l. Se kòmsi w pa vle m di w konvèti epi ou menm w ap rale m vin jwenn ou. Tankou, se pa w la ki pi bon. Se menm bagay la ki fèt lè nou youn ap choute sou lòt. 

Preche levanjil ta dwe senp. M gen anpil zanmi m konn pataje moso Labib ak yo san li pa aksepte Kris epi nou fini, nou kontinye zanmi. Gen twòp faktè ki lye nou nan yon kominote pou n kite yon sèl ap detwi nou: relijyon. 

Si n ap swiv mwen byen, m sipòte tout sa m kapab, san bezwen konnen si moun sa a se kretyen, vodouyizan, renmen, plase, marye, divòse. Chwa pou m ede kominote m pa chita sou kwayans yon moun, li chita sou entansyon pou m fè byen. Toutfwa, si byen sa a m ap fè a ka fè m pèdi moral kretyen mwen, m ap kite l.

M p ap kondane w pou fimen, alkòl, vodou, elt, men nan oken ka ou pa ka ankouraje m ni fòse m fè l. Lè m gade w, m pa wè fimè a, alkolik la ni sèvitè lwa a. Dabò, m wè yon kreyati Bondye tankou m, yon pechè tankou m, yon ayisyen tankou m ki ka vin sa l vle ye demen. Dayè...

M leve nan fanmi vodou. Grangranigrann mwen te manbo. M raple m se jis nan laj 19 lane yo konsa m te deside m pa pral kay bòkò ankò. M gen souvni plizyè fwa manman m konn al wè houngan ak mwen pou maladi. M pa ka konte konbyen fwa m manje kay Djeve, Wilbè, Fènan e kay Grann mwen nan manje lakou, latounen, gerizon anba peristil. Fòk mwen ta ekri yon liv pou m esplike istwa m nan koze vodou depi lè m piti rive 18-19 lane. Sa vle di m konnen anpil koze. 

Jounen jodi a, jèn ki fèt an lan 2000 yo pa konn anyen nan sa ki te konn pase Lyankou lè bòkò yo ap fete, chanpwèl. Nan Monkamèl, Djeve p ap pa voye plizyè gode degouden, dis kòb anlè pou timoun ramase. Koulye a, nou jèn jan, nou demwazèl, nou gen telefòn, nou eklere. Lontan, la a, nan Lyankou,...m p ap pale. 

Se pou m di w orijin nou pa diferan. Se la a nou tout soti depi w se vrè pitit Lyankou. Kidonk, levanjil pa ka divize nou sou plan sosyal, ekonomik ak edikatif. E li pa ta dwe posib menm sou plan politik. Se istwa nou nou pa konnen ki fè nou ka kite politik vin antre nan mitan nou e fè n dozado. M pa t leve jwenn kilti sa isit la. 

Lontan, te gen plizyè lakou: Mapou, Desten, Djeyis, Chalestan, Fènan, elt. Nou te toujou rankontre nan foutbòl, jwèt mab, domino, bann rara, pike diri. Pi gwo abiman nou se te chòt oswa eslip pou gason, kilòt pou timoun e wòb pou demwazèl. Konsa tou, si w se gason, ou ka gen yon mayo anwo do w. Se nan pita nèt ou te konn met sandal. M a gentan vin ak lòt koze.

Pou koulye a, m ta renmen tout jèn k ap grandi yo aprann listwa Lyankou anba bouch granmoun pou n pa kite relijyon ak politik divize nou. Annou toujou wè enterè Lyankou avan tout bagay. Sinon, se nou ankò k ap detwi l. 

Randevou a kase soti 12 pou rive 16 jiyè 2020, live sou Facebook, pou m pote yon bouyon enfòmasyon pou ou sou Lyankou nan tèt kole ak plizyè lòt pitit kay la ki te la. 

Si nou vle develope lakay nou, ann pa fè biznis, mizik, etidye, politik, bati kay ak legliz sèlman. Annou fè listwa. 

JDE

Senk (5) rezon ki fè tèt ansanm pa bay rezilta

|LIDÈCHIP 

Plis n ap aji san reflechi se plis aksyon nou yo p ap pote fwi. N ap swe, bouke, bay tout enèji pou anyen. Poutan, nou gen ase fòs pou n goumen, nou gen volonte men eksperyans montre nou manke anpil bagay pou n pote laviktwa menm lè nou met tèt ansanm.

M ap pataje 5 nan tèks sa a pou ou menm k ap li ka wè lòt yo.

1. Nou youn pa fè lòt konfyans

Konfyans se baz tout inyon k ap pote fwi. Se sa k fè m santi m ansekirite lè m met ansanm ak ou pou n travay. Malerezman, malgre nou ansanm, nou youn ap doute sou entansyon lòt, nou pè pou yo pa twonpe nou. Dout sa a ka soti nan jijman nou fè de pase alye nou yo, swa paske yo te echwe. Yon echèk pa defini defèt total. Okontrè, se sa ki bay eksperyans. Pou n rive ansanm, fòk nou ka padone sa ki te pase yo, sinon rankin ka kraze plan nou genyen an. Si gen dout, nou dwe chita pou n regle tout sa ki ka kreye dout. Sinon, tèt ansanm nou se yon lòt fòm divizyon.

2. Nou pa met tèt ansanm nan solidarite

Si n ap batay ansanm, nou youn dwe ede lòt. Pa ka gen vrè inite si m ap soufri pandan w ap rejwi. Vant ou plen, m grangou. Ou chaje privilèj, mwen m ap mande. Si se konsa, tèt ansanm nou an p ap dire ni pote fwi paske gen inegalite antre nou. M p ap pa ka kenbe paske m pa fòs ou genyen. Nou gen dwa pa gen menm resous men pandan tèt ansanm nou an, fòk nou youn sipòte lòt.

3. Nou pa met tèt ansanm nan renmen

Trè souvan, nou youn pa renmen lòt. Sa te fè n pa t janm dyaloge. Men, pou w atenn yon objektif, ou vle mete avèk enmi w. Otomatikman, nou nan ipokrizi paske se pa kè nou ki ini vre. Okontrè, si nou te renmen alye nou yo, konba n ap fè yo te gendwa pa t posib. Nou t ap defann yo, yo pa t ap vyole dwa yo jis pou n ta bezwen goumen pou fè respekte l. Si nou te konn panse e aji pou n manje ansanm, nou pa t ap bezwen goumen pou grangou. Renmen t ap gentan rezoud pwoblèm sa.

4. Nou pa met tèt ansanm pou nou youn pwoteje lòt

Se pa lè nou andanje pou n wè nesesite met tèt ansanm. Nou youn te dwe sekirite pou lòt avan. E malgre sa pa t konsa, si n deside ini nou, li dwe posib. Ou gen parapli pou  w evite mouye nan lapli, li pa genyen. Lè li andanje, ou pa pote l sekou. Ou gen mwayen pou w jwenn swen sante, li pa genyen. Tèt ansanm nou pa ka pote fwi.

5. Nou tout bezwen dirije

Depi gen omwen twa moun ki met tèt ansanm, fòk gen yon lidè. Depi gen yon lidè, fòk li gen moun pou l dirije. Nou tout pa ka lidè prensipal men nou chak gen yon pwen fò k ap itil nan lit la. Esansyèl la se atenn objektif la. Si nou met tèt ansanm pou n ka dirije, se pa chanjman nou vle tout bon paske se divizyon ki lakoz lidè yo pa ka bay rezilta. Yon sistèm pa yon wobo. Se yon seri eleman ki la pou n itilize pou bay rezilta. Rezilta a se prèv nou byen oswa mal itilize l.

Tèt ansanm se yon nesesite pou tout batay k ap fèt pou kolektif la, men si nou youn pa fè lòt konfyans, nou pa solidè, nou youn pa renmen lòt, nou youn p ap pwoteje lòt e nou tout bezwen dirije, nou p ap janm pote yon viktwa ki dire e benfik pou nou tout.

JDE

Être tien ou mourir

À mesure que le temps passe 

Je me rends compte 

Que ta présence me fait défaut 

C'est un crime 

C'est anormal 

C'est la fin de ton monde 

Dans mon existence 

Pardon d'avoir cru 

Qu'il me suffisait le soleil 

Pour éclairer ma journée 

Je me suis laissé aller 

Par le vent de cette folie 

Qui rongeait ma fierté 

À l'insu de ma soif de t'aimer

Reviens

Mes yeux sont ouverts 

Ne me dis pas qu'il est trop tard

Reviens

Maintenant, je comprends 

Et je suis prêt à payer le prix 

Quitte à devenir prisonnier de tes mépris

Ma vie manque de tes secondes

Pour calculer ses minutes 

Elle manque de tes sourires 

Pour ravoir son sens 

Ton départ a été tel un séisme 

Qui a fissuré les quatre murs de mon coeur 

Il n'en reste que les décombres 

Point besoin de me conduire 

Au tribunal de tes raisons

Car ma chasse est prise en flag

Et ma conscience connait déjà la sentence 

Alors, hâte-toi d'en prendre ta revanche 

Te rester l'unique est ma seule requête 

Que je vive libre avec toi ou mourir 

JDE

Leve pou w travay

Gen kèk desepsyon y ap ba w ou pa ka pran yo anliy ni nan absans ou. Se fasafas pou w tande l. Kit w ap kriye, sezi ou tranble, se pou w rete la, de je w nan je moun k ap pale a pou w pa janm bliye jou sa, kote sa, lè sa a e jan yo t ap trete w tankou anyen. 

Pa sèlman pran plezi nan tande felisitasyon, bèl pawòl. Se pou w mare senti w pou w tande blam tou. Gen desizyon w pral pran nan vi w gras ak kèk repwòch. Gen leson w ap pran se gras ak kèk erè ou fè pou w pa janm oze reyaji konsa, reflechi konsa, pale konsa. 

Li posib pou se fyète moun ki rich e popilè yo ki motive w sèlman. Nan panse w, yo te leve yon bon maten epi yo jwenn yon ja devan pòt yo san travay. Ou ka imajine bèl mwayen w wè vwazen an genyen an se nan lavi fasil li fè l jis ou di se pa anyen, m ka fè l tou. M a rive tou. Wi, w a rive tou men pinga w panse se konsa l te rive. 

N ap viv nan yon sosyete kote egoyis anjandre barikad pou lajenès. Si w pa vle vann diyite w, 14 lane lekòl ou oswa 4 a 5 lane etid inivèsitè w la ou p ap fè okenn pa, okenn bras, okenn pwogrè. Sa fè, tchik jèn ou wè ki pase yo se krèm nan, ti ma a, ti gout la. Respekte yo, lapriyè pou yo, swiv yo. Yo pa enmi w. Si w wè yo pa ka lonje men ba w pa gen rankin kont yo paske manzè lavi tèlman fwete yo, yo pè antre nan wonn pou yo pa viktim. 

Ou gen 2 pye, yon sèvo, 2 men, 2 grenn je ak 2 zòrèy, itilize yo pou w jwenn sa w ap chache a nan bon kondisyon. Mache chache, touche tout sa w jwenn, fè tèt ou travay, gade reyalite a epi retire konplèks, tande moun ki pi gran, ki konnen, ki gen sajès pou w konn kòman lavi taye banda. 

Gen moun ki rive nan vi yo gras ak yon metye yo te aprann, gen lòt se gras ak bon zanmi, bon fanmi. Konsa tou, genyen se desepsyon yo te pran ki te fè yo dekouvri valè libète yo. Alo? Ou toujou la? W ap tande m? Ou konprann? 

Lè w konprann opòtinite w ka pwofite nan fè fas ak move sitiyasyon nan lavi w, w ap wè wout pou w pran pou w reyisi a e petèt ou va remèsye moun ou te panse ki t ap desann ou an, ki pa t respekte w la. 

Si w la toujou,  sa vle di echèk poko mete w K.O. Leve pou w travay! Ou dwe reyisi!

JDE

Cinq versets qui prouvent que Jésus était venu pour tous.

Nombreux sont ceux qui disent que Jésus n'a pas été envoyé aux africains et, conséquemment, aux haïtiens. S'ils ont des arguments pour le prouver, il y a des textes bibliques pour tuer leurs arguments et faire jaillir la lumière afin de sauver les victimes de ce mensonge largement répandu sur les réseaux sociaux. 

Voici donc cinq (5) des versets qui prouvent que Jésus a été envoyé à tout le monde. 

1. Gn 1:1 Au commencement, Dieu créa les cieux et la terre.

Assure-toi que tu es sur une autre planète n'ayant pas été par Dieu avant de croire qu'il n'a pas envoyé son Fils te sauver du péché de tes ancêtres, à savoir Adam et Ève. 

2. Jn 3:16 Car Dieu a tant aimé le monde qu'il a donné son Fils unique, afin que quiconque croit en lui ne périsse point, mais qu'il ait la vie éternelle.

Dieu n'a pas aimé un continent ou une nation, il a aimé le monde regroupant toutes les nations. Alors, si tu as choisi de périr au lieu d'avoir la vie éternelle, ce n'est pas la faute de Dieu ou de Jésus. 

3. Mc 16:15 Puis il leur dit: Allez par tout le monde, et prêchez la bonne nouvelle à toute la création.

Dans la mission qu'il a confiée à ses disciples avant son ascension, Jésus n'a pas séléctionné un continent ou les pays des blancs. Il leur a dit de se rendre par tout le monde pour prêcher l'évangile. Alors, si tu n'es nulle part dans le monde, tu as mille raisons de croire que Jésus était venu pour les blancs. 

4. Lc 24:47 et que la repentance et le pardon des péchés seraient prêchés en son nom à toutes les nations, à commencer par Jérusalem.

Il fallait commencer par un endroit et puisque Jérusalem était le centre de l'histoire, Jésus leur a dit de commencer par là, de même que cela aurait pu être en Espagne ou au Mali. Bon, je pense que si tu acceptes pas Jésus pour te sauver, cela prouve que tu as entendu le message. Et c'était l'objectif de Jésus. Quant à ton salut, cela revient à toi seul.

5. He 9:27 Et comme il est réservé aux hommes de mourir une seul fois, après quoi vient le jugement,

Je te présente Socrate en plein syllogisme: "Tous les hommes sont mortels, Socrate est un homme, donc Socrate est mortel." Majeur: Tous les hommes sont pécheurs. Mineur: Tu es un homme. Conclusion: Donc, tu es un pécheur. Alors, ne crois pas que le jugement que parle la Bible ne te concerne pas parce que tu es noir ou blanc. 

Crois-tu malgré tout que Jésus n'a pas été envoyé à tout le monde? Sinon, c'est ton choix. Si oui, repens-toi.

JDE

Pa kanpe ni dekouraje

Si m ta di w m pa konn gen anvi bay vag, konnen se manti. Men si m di w chak fwa m vle fè sa, m jwenn plis pase 10 rezon pou m kontinye, ou p ap kwè m. 

Lè w twò estrese, ou enpasyan, ou twò konsantre, ou pèdi filing travay la, ou manyen telefòn nan twòp, w ap panse ak siksè lòt moun ki te dwe dèyè w, ou estime w ap travay twò lontan, dekourajman fasil mete pye nan sa w ap fè a. 

Si youn nan ka sa yo konn rive w, se pa dekourajman pou w kite anvayi w. Se moman pou w pran yon brek, al distrè w, gade yon fim, al kay yon bon zanmi pou w pale, tanmen yon adorasyon, tande bèl mizik. Epi retounen sou tab la, sou chantye a, nan atelye a, nan jaden an, nan biwo a pou w kontinye travay. 

Si w konnen gen yon kalkilatris ki pa gen chif 0 ak 1 pou konbine pou bay 10, ou mèt bay vag imedyatman w fin li tèks sa a. Sinon, reaktive, repedale, rekòmanse oswa kontinye. Pa pale de koze kanpe ni dekouraje a menm. 

JDE

Padone fè pati konba a

Meyè fason pou w soulaje nan doulè mal la fè w la, se padone moun ki te fè l la. Kenbe l nan kè w ogmante soufrans yo chak jou. Chak fwa w panse ak pawòl sa a, kou sa a, desepsyon sa a, trayizon sa a, se soufrans ou k ap vin pi plis. 

Ou ka bezwen inyore l, evite l, fè kòmsi rankin ou ap rezoud li, men se pa vre. Sitou, lè ou se kretyen, ou ta dwe toujou evite gen pwoblèm ak moun, paske ofinal, menmsi w ta bat lestomak ou di w p ap janm padone l, ou mache fè moun pou li, ou menm tounen nan pase l pou w ka regle ak li, w ap nan obligasyon yon jou pou w padone l paske se sa Bondye te fè pou ou lè li te chwazi aksepte w malgre tout peche w yo. 

Sa pa vle di w fèb lè w padone. Okontrè, ou ase entèlijan pou w konprann rankin, vanjans p ap itil ou anyen. Ou ase fò pou w konprann mwayen ki pi fasil pou w evite plis doulè, plis chagren, plis lapèn, se kouri dèyè tout vye lide k ap fè w panse tankou mechan an. Ala kontan w ta kontan si yon malè ta rive moun ki te fè w mal la! Ala fèt ou ta fè si l ta nan yon zen, yon pèt, nan mawon! Wi, ou t ap soulaje men di tèt ou, ala kontan dyab la ta kontan si Bondye ta kondane w pou valè peche w fè anba tab, nan fè nwa! Bondye t ap jis, pa vre? Menm jan ak ou menm ki jis nan bezwen pou malè rive enmi w lan. 

Pa panse m ase timoun pou m konprann li fasil pou w padone mal yo te fè w la. Dayè, m te nan menm sitiyasyon sa plizyè fwa men se chak jou m ap mande Bondye ban m fòs pou m padone. Se pa mwen ak ou sèlman ki nan ka sa a, moun ou pa ta panse gen rankin anvayi kè yo. Ou p ap konn sa si w pa nan yon sitiyasyon, yon malè, pou w tande bri k ap fèt, fèt k ap fèt, chanpay, byè, wiski k ap koule, jis paske ou nan yon pwoblèm ki fè enmi w yo rejwi. 

Si w panse w ka goumen kont tout lespri mechan k ap fè kanaval nan lemonn, m dezole jodi a pou m di w ou echwe menm avan w kòmanse. Se sèl renmen ki ka fè w pote viktwa kont vyolans espirityèl ki kache dèyè anpil souri, bèl pawòl, bèl rad e bèl kanpay. 

Si padon te fasil, Covid-19 pa t ap fè tout dega sa yo. Mwen menm ak ou pa t ap lwen konsa. Nou pa t ap dozado konsa. Se paske listwa ki mal tounen antre nou yo kite yon rankin ki pi fò pase talan nou, diplòm nou, doktora nou, konsyans nou, richès nou, relasyon nou. Sèvo nou ase pwisan pou l kenbe anpil konesans men kè nou pa gen menm yon kilobayt espas pou sipòte moun ki fè nou mal. E se ti espas sa a ki fè anpil nan nou pa kwè Bondye egziste. Nou bay rankin plis plas, plis pouvwa, plis otorite ki fè malgre nou ansanm, lespri nou divize. 

Meyè fason pou w soulaje nan doulè mal la fè w la, se padone moun ki te fè l la. Kenbe l nan kè w ogmante soufrans yo chak jou. Chak fwa w panse ak pawòl sa a, kou sa a, desepsyon sa a, trayizon sa a, se soufrans ou k ap vin pi plis. 

JDE