Gen plizyè moun kap swiv ou

Gen plizyè moun kap swiv ou, kit sou rezo sosyal yo kit nan vrè vi a. Se ka lekòl la, nan inivèsite a, lakay ou, nan legliz la, nan travay la, nan mache a e menm nan jaden an.

Gen moun kap tann ou tonbe pou griyen dan sou ou. Toutotan wap mache dwat, sa ba yo pwoblèm paske atant yo pa konble. Se jan de moun sa yo ki kouri kwè nan fo nouvèl yo bay sou ou. Menmsi w wè l tris, li kontan.

Gen moun kap tann ou echwe nan etid ou, nan fwaye ou oubyen nan biznis ou. Yo pa konn sakrifis wap fè, yo inyore imilyasyon ak desepsyon wap pran. Defwa, si yo te konn manje wap manje yo te ka wè w mal. Yo pa konn kòman rad ou lave ni kòman w fè pou achte pwodwi ki pi nesesè yo.

Gen moun kap tann ou di yon betiz, li te mèt se nan jwèt, pou yo pwofite di w tout sa ki te nan kè yo. Wa sezi paske w pa tap janm panse si se ta entèl ki ta di w sa. Toutotan sa bon, lap difisil pou w dekouvri vrè zanmi w, paske se nan malè ou konnen moun ki renmen w tout bon vre.

Gen moun kap swiv ou paske w se yon modèl pou li. Pawòl ou se gid pou li. Tout saw dakò, li dakòl. Li konn menm pran w pou yon dye pou tèlman li fè w konfyans. Malerezman, ou se lòm, yon jou kanmenm wap fè yon fo pa, men pa pèdi espwa paske moun ki renmen w tout bon an, pap pwofite yon okazyon dezagreyab pou abandone w.

Gen moun ki avè w toutotan ou byen aji avè l. Ou se pi gwo patwon, li rele w bòs, direktè, patnè pam, zanmim, bro m, zokòt mwen. Ey! Pa panse sa sifi pou montre ke w fin rive. Sa se aparans. Tann lè eskandal la pete wa banm nouvèl.

Gen moun ki pa dakò w korije l, ni blame l lè l fe erè. Li ta toujou bezwen pou w bat bravo pou tout sa l fè. Wa sezi tande gwo mo lap di w, lè w rale zòrèy li.

Mwen diw tout sa paske m konnen lavi a se yon lekòl. Nou tout se elèv men n pa nan menm klas. Nou pa gen menm kapasite pou sipote e reyaji. Gen nan nou ki emsosyonèl, vyolan, dou, neglijan, parese, pasyan.... men sa pap anpeche n viv ansanm.

Lè move moman yo rive nan viw, pa bliye tout kalite moun sa yo kap swiv ou.
Pare kòw pou w tande,
Pare kòw pou w gade
Pare kòw pou w swiv
Pare kòw pou sipòte.

Pran sanw paske gen moun kap swiv ou. Sa k pa pale yo pi plis pase sa kap pale yo